Mesfushori shqiptar i Bayer Leverkusenit, Granit Xhaka, ka shprehur zhgënjimin e tij pas humbjes 3-0 të skuadrës së tij ndaj Bayern Munichut në ndeshjen e parë të 1/8-tës së Ligës së Kampionëve, por ende beson se ka lojë.
Duke reflektuar për ndeshjen, Xhaka pranoi sfidat me të cilat përballet skuadra e tij, por beson se ende asgjë nuk është vendosur pasi ka edhe 90 minuta lojë.
“Sigurisht që zhgënjimi është i madh në këtë moment. Pavarësisht pengesës së hershme, ne ishim mirë në lojë, nuk lejuam shumë dhe patëm një shans të mirë përmes Jeremie”, ka thënë fillimisht Xhaka pas ndeshjes.
Xhaka ka qëndruar i fokusuar te gjërat pozitive, duke vënë në dukje qëndrueshmërinë e skuadrës, pavarësisht humbjes.
“Ne nuk e lejuam Bayernin të na dominojë plotësisht dhe treguam karakter të mirë për të qëndruar në lojë. Kartoni i kuq e ndryshoi pak lojën. Kemi edhe 90 minuta ose më shumë, ne besojmë në veten tonë dhe do të japim gjithçka!”, tha Xhaka.
