Kryetari i Kuvendit të Kosovës, Glauk Konjufca ka folur për dhunën fizike që u pa sot në Kuvend.
Pas pauzës dy orëshe pas situatës së krijuar, Konjufca ka thënë se këto ishin pamje të papranueshme, derisa kërkoj nga deputetët që të vetëpërmbahen.
“Ne e dimë që jemi shtet i ri edhe Kuvendi dhe institucionet kanë përjetuar peripeci të llojllojshme, por së paku deri më sot kemi pasur imunitet të mirë që është vlerësuar edhe nga bota demokratike e ky imunitet që ju kemi rrezitu akteve të tilla është përleshja fizike. Kemi pasur probleme të natyrave tjera por jo në kuptimin fizik drejt fytyrës, kokës, trupave me ja mësy njëri-tjetrit siç e pamë sot”, tha Konjufca.
Kryeparlamentari shtoi se “këtë nuk ja dëshirojmë askujt e kjo është një sjellje që do të gjykohet nga qytetarët dhe nuk do të doja të përsëritej në Kuvend”.
“Ne i kemi mosmarrëveshjet tona, si forca politike i kemi papajtueshmëritë tona të thella, por ato mospajtime gjithmonë i bëjnë nder vendit dhe Kosovës nëse i mbajmë në nivelin e funksionimit normal të institucioneve tona demokratike. Po ju bëjë thirrje që ta merrni me qetësi punën që e bëjmë së bashku dhe të përpiqemi të kalojmë këtë ditë të vështirë dhe këto momente të vështira për vendin tonë”, tha Konjufca.
Konjufca u bëri thirrje deputetëve për një “minimum të një sjellje që do ti gëzonte qytetarët e republikës tonë”.
“Nuk i kemi kursyer fjalët më të rënda për njeri-tjetrin, në momentin që kalohen nga fjalë në goditje ato nuk trajtohen më vetëm në Kuvendin e Kosovës. A duam ne që të kalojmë në atë gjendje, a është për deputetin e denjë një sjellje e tillë, unë them që jo. Meqenëse është puna kështu, bisedova me kryeministrin ai po heq dorë nga fjala e tij që pat, dhe nëse ne si deputet kemi mirëkuptim për me vazhdu në pikë tjetër atëherë vazhdojmë me pyetjet parlamentare”, tha Konjufca.
