Deklaratat e fundit të presidentit serb, Aleksandar Vuçiq, janë cilësuar nga autoritetet e Kosovës si të rrezikshme, destabilizuese dhe në përputhje me një politikë shtetërore të orientuar drejt tensionimit të situatës në rajon.
Kryeministri në detyrë, Albin Kurti ka dënuar ashpër retorikën kërcënuese të Vuçiqit dhe i ka bërë thirrje Bashkimit Evropian, NATO-s dhe bashkësisë ndërkombëtare që të reagojnë vendosmërisht ndaj kësaj qasjeje agresive të Serbisë.
“Kur një president dhe njëkohësisht komandant suprem i ushtrisë lëshon kërcënime publike me tone nxitëse të konfliktit, kjo nuk mund të quhet qëndrim personal, por politikë shtetërore e Beogradit”, tha ai.
Sipas institucioneve të Kosovës, rasti i arrestimit të Igor Popoviqit, i dyshuar për nxitje të urrejtjes dhe përçarjes etnike, po trajtohet në mënyrë të drejtë dhe profesionale nga sistemi i drejtësisë, në përputhje me standardet ndërkombëtare.
Por Serbia, në vend se të mbështesë ligjin dhe drejtësinë, ka zgjedhur të mbrojë figurat që nxisin urrejtje dhe të kërcënojë Kosovën me pasoja.
Në reagimin e publikuar, Qeveria ka përmendur një sërë ngjarjesh që dëshmojnë për përfshirjen direkte të Serbisë në përpjekjet për destabilizimin e Kosovës, përfshirë:
rrëmbimin e policëve të Kosovës më 14 qershor 2023,
sulmin ndaj KFOR-it më 29 maj 2023,
sulmin terrorist në Banjskë më 24 shtator 2023,
dhe kërcënimet e vazhdueshme nga zyrtarë të lartë serbë.
Po ashtu, është theksuar se grupet paramilitare të përfshira në këto veprime kriminale gëzojnë mbështetjen e plotë të shtetit serb dhe janë përdorur madje edhe për sigurimin personal të Vuçiqit dhe për shtypjen e protestave qytetare në Serbi.
Kosova ka ritheksuar përkushtimin e saj ndaj rendit dhe ligjit, duke theksuar se nuk do të tolerojë asnjë formë të ndërhyrjes së jashtme apo të instrumentalizimit të urrejtjes dhe përçarjes.
“Ne nuk jemi të frikësuar nga retorika e Vuçiqit, por jemi të vendosur për ta mbrojtur demokracinë, sovranitetin dhe rendin kushtetues”, thuhet më tej në deklaratë.
Në të njëjtën kohë, qytetarët e Kosovës janë këshilluar të shmangin udhëtimet drejt Serbisë për shkak të rrezikut të provokimeve dhe ndalimeve arbitrare nga autoritetet serbe.
Qeveria i ka bërë thirrje NATO-s, BE-së dhe partnerëve tjerë ndërkombëtarë që të mos i relativizojnë kërcënimet e Vuçiqit, duke i cilësuar ato si pjesë e një fushate të organizuar destabilizuese në Ballkanin Perëndimor, e cila ka për qëllim eksportimin e krizave të brendshme të Serbisë përmes ndërhyrjes në vendet fqinje.
Në fund, Kurti ka rikujtuar përparimet e arritura në integrimin e komunitetit serb në jetën institucionale të vendit, përmes punësimit, arsimit dhe sundimit të ligjit, duke u bërë thirrje të gjithë qytetarëve për maturi, unitet dhe bashkëpunim për ruajtjen e paqes.
Kosova mbetet e vendosur në rrugën e saj drejt integrimeve euroatlantike, duke garantuar se kërcënimet e Serbisë nuk do të ndalin as progresin, as përkushtimin për stabilitet dhe drejtësi.
