Faton Klinaku dhe Nuredin Selmani nuk e kanë pranuar fajësinë për kanosje të kryeministrit në detyrë, Albin Kurti.
Në leximin e aktakuzës, prokurori special, Bekim Kodraliu tha se Faton Klinaku e ka kanosur seriozisht dhe publikisht kryeministrin Albin Kurti, më 2023.
“I pandehuri Faton Klinaku, seriozisht dhe publikisht e ka kanosur përmes rrjetit social Facebook duke postuar. Pas reagimeve të opinionit publik, i pandehuri ka përsëritur një shkrim me përmbajtje kërcënuese. I pandehuri seriozisht e ka kanosur me vrasje kryeministrin Albin Kurti”, tha ai.
Edhe për të akuzuarin Nuredin Selmanin, prokurori special tha se “seriozisht dhe publikisht e ka kanosur [Kurtin]” përmes rrjetit social Facebook.
Pas seancës së shqyrtimit fillestar, i akuzuari Faton Klinaku tha se do të bëjë kërkesë për hudhje poshtë të aktakuzës. Ai tha se nuk ka kryer asnjë vepër penale, pasi i njëjti akuzohet për kanosje të kryeministrit në detyrë, Albin Kurti.
Faton Klinaku nga OVL-UÇK tha se postimi ende figuron në llogarinë e tij në Facebook.
“Mirë qe ishte përballje se ju e dini qe e kam kërkuar vet atë përballje, ju e dini që kam kërkuar edhe vetë atë përballje. Sa i përket aktakuzës konsideroj që kurrfarë vepre penale nuk ka. Dhe postimin tim që ka qenë i përsëritur figuron ende, para dy vitesh që e kam postuar në Facebook edhe nuk e heq sepse nuk ka vepër penale. Ne luftën e kemi bërë si pjesëtarë të UÇK-së, kemi luftuar që ta kemi shtetin, ta kemi sistemin tonë të drejtësisë, prandaj është obligim i secilit qytetar që t’i përgjigjet…Procesi gjyqësor tash do të vazhdojë, përmes avokatit ne do të bëjmë kërkesën për hudhje poshtë të aktakuzës”, tha Klinaku.
Ndërkaq, i akuzuari tjetër, Nuredin Selmani, i cili para trupit gjykues u deklarua i pafajshëm, tha “Albin Kurti të mos ketë frikë nga unë”.
“Albin Kurti të mos ketë frikë nga unë, por të frikësohet nga historia që një ditë ndoshta do ta dënojë historia e popullit shqiptar. Prandaj edhe një gjë duhet ta cek, se ky ‘tuc’ duhet të lajmërohet çdo herë në Prokurori, t’i përgjigjet prokurorisë sepse duhet me dhënë përgjegjësi për paratë e shtetit, paratë e këtij populli kah po shkojnë…Unë konsideroj qe jam i pafajshëm, ta shohim”, tha Selmani.
Në seancën e shqyrtimit fillestar, ka qenë i pranishëm edhe kryeministri në detyrë, Albin Kurti. /kp/
