`Koalicioni për Familje` e ka konsideruar vendimin e Panelit Zgjedhor për Ankesa dhe Parashtresa pa bazë ligjore. PZAP-ja e gjobiti me 4 mijë e 500 euro këtë subjekt për shkak të shkeljet së Kodit të Mirësjelljes gjatë fushatës elektorale.
Eman Rrahmani, përfaqësues i koalicionit, ka thënë se vendimi i PZAP-së është shkelje e drejtpërdrejtë e të drejtave politike të qytetarëve dhe një kërcënim për angazhimin e koalicionit në mbrojtje të vlerave të familjes.
“Ky veprim është i paargumentuar dhe i pabazuar,” tha Rrahmani, duke shtuar se koalicioni po përballet me një situatë që cenon angazhimin dhe kauzën e tij për mbrojtjen e familjes.
Ai theksoi gjithashtu se spoti televiziv, i cili është në përputhje me vlerat e shoqërisë, nuk përmban asnjë gjuhë urrejtjeje dhe nuk mund të ndalohet.
“Ne nuk mund të ndalojmë asnjëherë gjuhën tonë, ku flasim për vlerat e familjes”, theksoi Rrahmani.
‘Koalicioni për Familje’ thekson se do të vazhdojë të angazhohet dhe të punojë për mbrojtjen e këtyre vlerave.
‘Koalicioni për Familje’ thekson se do të vazhdojë gjithashtu të argumentojë për mbrojtjen e këtyre vlerave dhe të kundërshtojë çdo formë të instrumentalizimit që është në dëm të familjes.
Organizata joqeveritare CEL Kosova dhe Dylberizim parashtroi ankesën në PZAP kundër subjektit me arsyetimin se kandidatët e tij kanë përdorur gjuhë nxitëse dhe diskriminuese ndaj komunitetit LGBTI+.
Kurse, PZAP i shqiptoi gjobë këtij subjekti politik në lartësi prej 4.500 eurosh. Sipas Panelit Zgjedhor për Ankesa dhe Parashtresa, sjelljet e Koalicionit bien ndesh me Ligjin për Zgjedhjet e Përgjithshme
Njëkohësisht, PZAP ka konstatuar se Kodi i Mirësjelljes i detyron të gjitha subjektet politike, kandidatët, anëtarët e subjekteve dhe mbështetësit e tyre që ta respektojnë këtë kod me qëllim të krijimit të kushteve që gjatë periudhës së fushatës, veprimet e subjekteve politike të jenë në një atmosferë të tolerancës demokracisë, paqes dhe respektit për sundimin e ligjit.
