Koalicioni i OJQ-ve për Mbrojtjen e Fëmijëve në Kosovë (KOMF) u ka bërë thirrje të gjitha subjekteve politike që të mos shfrytëzojnë fëmijët në fushatë zgjedhore e prindërve të mos i politizojnë.
Sipas këtij koalicioni organizatash, informacionet dhe raportimet nga terreni gjatë ditëve të fundit kanë treguar se në disa raste, partitë politike po përdorin dhe përfshijnë fëmijë për të promovuar subjektet politike.
“Përfshirja e fëmijëve në fushatë elektorale nga subjektet politike përbën shkelje të të drejtave të tyre, shfrytëzim, e në të njëjtën kohë nuk është në interesin më të mirë të tyre”, është thënë në thirrjen e Koalicioni i OJQ-ve për Mbrojtjen e Fëmijëve në Kosovë.
KOMF-i, po ashtu i ka bërë thirrje Komisionit Qendror të Zgjedhjeve (KQZ) që të monitorojë nga afër aktivitetet e subjekteve politike dhe në çdo rast të shkeljes së konstatuar të lidhur me shfrytëzimin e fëmijëve si pjesë e fushatës elektorale, të ndërmarrë masa bazuar në legjislacionin në fuqi.
“KOMF në të njëjtën kohë i bën thirrje edhe prindërve që të mos i politizojnë fëmijët, të mos i përfshijnë në asnjë formë në fushatë dhe të mos i marrin fëmijët me vete në aktivitetet të cilat organizohen nga partitë politike”.
Ky koalicion gjithashtu thirrje ka edhe për mediat që të bëjnë publike rastet ku fëmijët shfrytëzohen për qëllime partiake.
“KOMF-i i bën thirrje mediave të cilat mbulojnë fushatën zgjedhore, që të ndërmarrin një rol aktiv në monitorimin e situatës dhe të bëjnë publike rastet ku fëmijët shfrytëzohen për qëllime partiake gjatë fushatës elektorale, gjithmonë duke mbrojtur identitetin dhe integritetin e fëmijës”, është thënë në thirrjen e Koalicioni i OJQ-ve për Mbrojtjen e Fëmijëve në Kosovë.
