Një ngjarje tronditëse ka goditur futbollin ekuadorian dhe klubin Emelec. Sipas raportimeve zyrtare të Policisë, gruaja dhe djali i futbollistit Jackson Rodríguez janë rrëmbyer në orët e para të mëngjesit të së mërkurës në banesën e lojtarit në qytetin bregdetar të Guayaquil.
Autoritetet bëjnë me dije se persona të armatosur dhe të paidentifikuar kanë hyrë me forcë në shtëpinë e Rodríguez, duke grabitur sende me vlerë dhe para ‘cash’, përpara se të rrëmbenin anëtarët e familjes së tij. Fatmirësisht, vetë futbollisti ka shpëtuar pa lëndime dhe aktualisht ndodhet nën mbrojtje policore.
Ndërkohë, klubi Emelec nuk ka dhënë asnjë koment zyrtar mbi situatën, duke ruajtur një qëndrim të heshtur për shkak të ndjeshmërisë së çështjes dhe hetimeve në vijim.
Ngjarja ka ndodhur në Guayaquil, një nga qytetet më të goditura nga vala e dhunës që ka përfshirë Ekuadorin në muajt e fundit. Që nga janari i vitit 2024, vendi ndodhet nën një gjendje të jashtëzakonshme për shkak të shpalljes së “konfliktit të armatosur të brendshëm” nga presidenti Daniel Noboa. Kjo masë synon të frenojë ndikimin në rritje të grupeve kriminale, të cilat autoritetet i konsiderojnë si “terroriste” për lidhjet e tyre me trafikun ndërkombëtar të drogës, shkruan syri.net.Hetimet për rrëmbimin e familjes së Rodríguez janë në zhvillim, ndërsa shpresa për kthimin e tyre të sigurt mbetet e lartë. Ngjarja ka shkaktuar shqetësim të madh si në radhët e futbollit ekuadorian, ashtu edhe në opinionin publik.
