Komisioneri për Zgjerimin i BE, Oliver Varhelyi ka reaguar në rrjetin social X, sa i përket vendimit historik për hapjen e negociatave me Shqipërinë për kapitujt themelorë që u mor një javë më parë në Luksemburg.
Ai tha se “angazhimi i fortë i Shqipërisë në procesin reformues drejt BE bëri që javën e kaluar të hapnim grupin e parë të kapitujve negociues, themeloret, në kuadër të Konferencës Ndërqeveritare”.
“Ne i japim Shqipërisë gjithë mbështetjen për të përshpejtuar procesin e reformave, në mënyrë që vendi të jetë anëtar i BE-së deri në fund të mandatit të ardhshëm”, shkruan më tej Varhelyi.
Komisioneri thotë se “ne kemi filluar ta ndërtojmë Europën në Shqipëri”, duke iu referuar projekteve dhe investimeve të BE në Shqipëri.
“Bypassi i Vlorës që inaguruam, Kolegji i Europës, i pari në Ballkan, etj, qoftë konektiviteti, qoftë energjia, qoftë mjedisi, qoftë trajtimi i ujërave apo i mbetjeve, në të gjitha aspektet e jetesës së përditshme, por mbi të gjitha plani i rritjes, do t’u ndihmojë juve të përshpejtoni reformat që ju mundësojnë anëtarësimin”, deklaron Varhelyi.
