Me ceremoni solemne sot është bërë dorëzim-pranimi i çelësave për 40 shtëpitë e ndërtuara në fshatin Frashër për familjet me nevojë sociale, projekt ky i realizuar nga Organizata “Qatar Charity” në bashkëfinancim me Komunën e Mitrovicës, njofton Kosova Post.
Me rastin e dhurimit të çelësave morën pjesë kryetari i Komunës së Mitrovicës, z.Bedri Hamza, drejtori i organizatës “Qatar Charity”, Zyra në Kosovë, z. Esam Dabab, dhe bashkëpunëtorët e tij, drejtorë të drejtorive komunale, drejtori i QKMF-së, “Dr. Nexhat Çuni” dhe familjet përfituese.
Kryetari i komunës, z.Bedri Hamza, tha se është nder i veçantë dhe kënaqësi që sot bashkë me miqtë nga “Qatar Charity” t’i bëjmë edhe 40 familje me banim, duke e zgjidhur çështjen më jetike, problemin e banimit, kur njerëzit kanë banim e kanë më të lehtë edhe organizimin e familjes dhe normalisht edhe jetën.
“Është projekt me vlerë milionëshe, dëshiroj ti falënderoj kontribuesit në këtë projekt dhe mbi të gjitha qytetarët dhe popullin mik të Katarit, që me paratë e tyre po kontribuojnë në zhvillimin ekonomik dhe në adresimin e çështjeve socio-ekonomike në Kosovë”, tha kryetari z.Hamza.
Më tutje kryetari z.Hamza potencoi se përveç 40 shtëpive kjo lagje ka edhe objekte përcjellëse e cila është një prej lagjeve me infrastrukturën më të kompletuar në Komunën e Mitrovicës.
Ndërkaq, drejtori i organizatës “Qatar Charity”, z.Dabab, ka thënë se ndihet i lumtur me realizimin e këtij projekti, i cili për të ka qenë si ëndërr. Falënderim të veçantë ka shprehur për kryetarin z.Hamza, duke shpresuar që kontributi dhe ndihma e komunës të vazhdoj edhe në të ardhmen./KosovaPost/.
