Kuvendi Komunal i Prishtinës e ka dënuar ashpër sjelljes e asamblistit të Lëvizjes Vetëvendosje, Gëzim Sveçla, i cili sipas tyre vandalizoi sallën e Kuvendit Komunal, duke përdhosuri, siç thonë ata, institucionin dhe duke sfiduar parimet bazë të demokracisë.
“Ky akt është një goditje brutale ndaj vlerave tona institucionale dhe një fyerje ndaj qytetarëve që presin nga përfaqësuesit e tyre të mbrojnë dhe avancojnë interesat e përbashkëta, jo të shkatërrojnë atë që u përket të gjithëve. Prej muajsh, asamblistët e Vetëvendosjes kanë bllokuar çdo iniciativë në të mirë të qytetarëve, duke përfshirë këtu edhe miratimin e buxhetit me qëllim që të krijojnë ngërç dhe të bllokojnë ofrimin e shërbimeve jetike për qytetarët”, thuhet në reagim.
Sipas Komunës së Prishtinës, sjellja e asamblistit të LVV-së është një akt i turpshëm që meriton dënimin e çdo qytetari dhe të çdo institucioni demokratik.
“Vetëvendosje e demaskoi veten, duke dëshmuar se qëllimi i tyre i vërtetë ka qenë dhe mbetet: përdhosja e institucioneve dhe penalizimi i qytetarëve. Kjo sjellje është një akt i turpshëm që meriton dënimin e çdo qytetari dhe të çdo institucioni demokratik”.
Ata kanë kërkuar nga organet e rendit që ta trajtojnë këtë rast me seriozitet maksimal. “Si për pengesën që iu bë përfaqësuesve në ushtrimin e detyrave të tyre kushtetuese, ashtu edhe për dëmtimin e pronës publike”, thuhet ndër të tjera në këtë reagim.
“Institucionet nuk janë fushëbeteja të interesave të ngushta politike, por baza mbi të cilën qëndron mirëqenia e qytetarëve. Veprime të tilla nuk janë vetëm të papranueshme, por edhe të rrezikshme për stabilitetin tonë si shoqëri demokratike”, përfundon reagimi i Kuvendit .
Ata kanë bashkëngjitur edhe një video me pamje të asamblistit të LVV-së, Sveçla teksa kryen këto veprime brenda sallës së Kuvendit Komunal.
