Kryetari i Kuvendit të Maqedonisë së Veriut, Afrim Gashi, realizoi sot takim me kolegun e tij nga Kuvendi i Republikës së Kosovës, Glauk Konjufca.
Duke i uruar mirëseardhjen, Gashi konstatoi se të dy vendet kanë bashkëpunim të shkëlqyer reciprok, që nga koha kur vendi e njohu pavarësinë e Kosovës. Është e rëndësishme të ruhet dhe thellohet ky trend i marrëdhënieve të mira në periudhën e ardhshme. Duke qenë se nuk ka çështje politike të pazgjidhura reciproke, fokusi duhet të jetë në projektet infrastrukturore, forcimi i bashkëpunimit ekonomik dhe tregtar, si dhe bashkëpunimi në fushën e arsimit, kulturës dhe shëndetësisë, me qëllim të lehtësimit të komunikimit dhe afrimit akoma më të madh të popujve.
Nga ana e tij, Konjufca e ka uruar Gashin për pozitën e re, si Kryetar i Dhomës Ligjvënëse, pas zgjedhjeve të suksesshme, të cilat ishin test i demokracisë, seriozitetit dhe pjekurisë së shtetit. Ai shprehu gjithashtu kënaqësinë për anëtarësimin e Maqedonisë së Veriut në NATO dhe uroi anëtarësimin sa më të shpejtë në Bashkimin Evropian.
Në kumtesën e lëshuar nga kabineti i kryetarit të Kuvendit të Maqedonisë së Veriut thuhet se të dy bashkëbiseduesit ranë dakord se qëllimi i integrimit evropian është i përbashkët, ndajmë të njëjtën kornizë vlerash dhe orientimesh, derisa Kosova shihet si partner i mirë dhe fqinj korrekt nga i cili merr mbështetje të vazhdueshme ndër vite.
