Konsumi i energjisë elektrike është rritur shumë ditëve të fundit, duke kulmuar natën ndërmjet të mërkurës dhe të enjtes, kur theu rekord pasi arriti deri afro 1500 MW. Ky konsum i jashtëzakonshëm për rrethanat e Kosovës është si pasojë e ngrohjes masive me energji elektrike.
Përkundër prodhimit vendor, që është thuajse në kapacitetet maksimale, prapë për ta mbuluar komplet konsumin nevojiten të importohen në pik mbi 500 megavatë në orë.
Konsumi jashtë çdo parashikimi ka bërë që kompania të importojë vetëm gjatë 20 ditëve të shkurtit rreth 21.5 milionë euro energji elektrike. Ndërkohë, vetëm gjatë muajve dhjetor, janar dhe pjesës së deritashme të shkurtit janë importuar afro 110 milionë euro energji elektrike.
Në këto rrethana, kursimi maksimal i energjisë elektrike duhet të jetë top prioritet i secilit, për shkak të çmimeve të larta që mbizotërojnë në tregjet ndërkombëtare dhe kostos që duhet paguar. Përdorimi i formave alternative të ngrohjes, aty ku ka mundësi, ndihmon jashtëzakonisht shumë, duke bërë që të ketë nevojë më pak për import dhe, rrjedhimisht, të ulen kostot.
KEDS dhe KESCO kanë bërë maksimumin që ky shërbim esencial të jetë në nivelin më të lartë dhe, duke i pasur parasysh sfidat e jashtëzakonshme me të cilat jemi përballur, ia kemi dalë.
Por, energjia elektrike është ndër sektorët më jetikë të vendit dhe duhet të jetë top prioritet nacional, pasi ndërlidhet direkt me zhvillimin ekonomik dhe mirëqenien e përgjithshme. Trajtimi i saj me kujdes, kursimi dhe përdorimi efiçient i saj bëjnë që komplet sektorit t’i lehtësohet barra, dhe këtë efekt më të ulët në kostot përfundimtare, të cilat mbulohen nga konsumatorët fundorë.
