Koreja e Jugut ka zhvilluar një stërvitje ushtarake, pranë kufirit të saj të fortifikuar tokësor me Korenë e Veriut. Këto janë të parat e llojit të tyre që kur Seuli pezulloi një marrëveshje të vitit 2018 me Veriun që synonte reduktimin e tensioneve ushtarake.
Stërvitjet e Koresë së Jugut mund ta shtyjnë Phenianin të ndërmarrë veprime provokuese në zonat kufitare.
Ushtria e Seulit njoftoi se tani e tutje manovrat e artilerisë dhe trajnimi i njësive të manovrimit në zonat kufitare, do të zhvillohen rregullisht. Masa erdhi gati një muaj pasi Koreja e Jugut vendosi të pezullojë marrëveshjen ushtarake të vitit 2018, më 4 qershor.
Shkaku i këtij pezullimi erdhi pas lëshimit të qindra balonave të mbushura me mbeturina nga Koreja e Veriut, si dhe përpjekjeve të Phenianit për të ndërprerë sinjalet GPS pranë ishujve kufitar.
Më parë, ndërkohë që marrëveshja ishte në fuqi, ushtrimet e artilerisë dhe stërvitjet detare ishin të ndaluara për të shmangur tensionet midis forcave të armatosura, shkruan A2CNN. Javën e kaluar, marinsat e Koresë së Jugut rifilluan një stërvitje në shkallë të gjerë me gjuajtje të drejtpërdrejtë, për herë të parë në shtatë vjet, në ishujt pranë kufirit detar perëndimor ndërkorean.
