Disa të rinj të Koresë së Jugut janë aq të shkëputur nga pjesa tjetër e shoqërisë dhe nga bota, saqë qeveria jugkoreane po ofron t’i paguajë ata për t’u “rifutur në shoqëri”.
Ministria e Barazisë Gjinore dhe Familjes njoftoi këtë javë se do të sigurojë deri në 650,000 won koreane (rreth 500 dollarë) në muaj për të izoluarit socialë, në një përpjekje për ta mbështetur “stabilitetin psikologjik dhe emocional dhe rritjen e shëndetshme”.
Rreth 3.1% e koreanëve të moshës ndërmjet 19 deri në 39 vjeç janë “të rinj të vetmuar”, të përkufizuar si të tillë që jetojnë në një “hapësirë të kufizuar, në një gjendje të shkëputur nga jashtë për më shumë se një periudhë të caktuar kohore dhe kanë vështirësi të dukshme për ta jetuar një jetë normale”, thuhet në raportin e ministrisë, duke cituar Institutin Korean për Shëndetin dhe Çështjet Sociale.
Kjo përbën rreth 338,000 njerëz në të gjithë Korenë e Jugut, me 40% të cilët e nisin izolimin e tyre që në adoleshencë, sipas ministrisë.
Faktorë të ndryshëm mendohet të jenë të përfshirë po ashtu, përfshirë vështirësitë financiare, sëmundjet mendore, problemet familjare ose sfidat shëndetësore. Masat e reja i kanë si objektiv në mënyrë specifike të rinjtë si pjesë e Aktit më të madh për Mbështetjen e Mirëqenies së Rinisë, i cili synon t’i mbështesë njerëzit jashtëzakonisht të tërhequr nga shoqëria, si dhe të rinjtë pa kujdestar ose mbrojtje shkollore, të cilët janë në rrezik të delikuencës.
Ndihma mujore do të jetë e disponueshme për të rinjtë e vetmuar të izoluar të moshës 9 deri në 24 vjeç, të cilët jetojnë në një familje që fiton nën të ardhurat mesatare kombëtare – e përcaktuar në Korenë e Jugut si rreth 5.4 milionë won (rreth 4,165 dollarë) në muaj për një familje me katër persona.
Të rinjtë mund të aplikojnë për programin në një qendër administrative lokale të mirëqenies; Në emër të tyre mund të aplikojnë edhe kujdestarët, këshilltarët ose mësuesit e tyre. “Të rinjtë e izoluar mund të kenë rritje fizike më të ngadaltë për shkak të jetesës së parregullt dhe ushqimit të pabalancuar dhe ka të ngjarë të përballen me vështirësi mendore, të tillë si depresioni për shkak të humbjes së roleve sociale dhe përshtatjes së vonuar”, thotë ministria e lartcekur, duke e vënë theksin tek rëndësia e “mbështetjes aktive”.Raporti i së martës i detajoi disa raste studimore, duke përfshirë një student të ri që kishte vuajtur nga probleme të shëndetit mendor dhe vështirësi në shoqërim që nga adoleshenca; ajo luftoi për t’u përshtatur në kolegj, në fund të fundit zgjodhi të mos merrte pjesë dhe u tërhoq më tej në vetvete.
Një studente tjetër u përball me dhunën në familje dhe urinë në shtëpi – duke e bërë të vështirë për të daljen nga shtëpia ose krijimin e marrëdhënieve me njerëzit jashtë. Asnjë person nuk u identifikua. Raporti i detajoi gjithashtu planet e ardhshme për veprime të mëtejshme, të tilla si shpërndarja e udhëzimeve për qeveritë vendore, rritja e rrjetave të sigurisë sociale të të rinjve dhe sistemet e zbulimit të hershëm, dhe puna më e ngushtë me objektet e mirëqenies së të rinjve si strehimoret ose qendrat e rehabilitimit.
Disa qytete dhe qeveri lokale tashmë kanë sisteme të ngjashme; Seuli, kryeqyteti i vendit, ka një “Projekt të Mbështetjes së Rinisë Rekluzive” që ofron këshillim për shëndetin mendor, zhvillim hobi dhe trajnime për punë, si dhe stërvitje për jetën për të rinjtë e izoluar.Ky fenomen nuk është unik për Korenë e Jugut. Japonia ka një problem të ngjashëm, me afro 1.5 milionë të rinj të vetmuar, të cilët njihen si hikikomori, sipas një sondazhi të fundit të qeverisë.
Disa dalin vetëm për të blerë sende ushqimore ose për aktivitete të rastit, ndërsa të tjerë nuk dalin as nga dhomat e tyre të gjumit. Kjo frazë u krijua në Japoni qysh në vitet 1980. Autoritetet në atë vend kanë shprehur shqetësim në rritje për këtë çështje gjatë dekadës së fundit, por Covid-19 i ka përkeqësuar gjërat, zbuloi sondazhii lartcekur. Nga të anketuarit, më shumë se një e pesta e cituan pandeminë si një faktor të rëndësishëm në stilin e tyre të jetesës. Arsyet e tjera të zakonshme të përmendura ishin shtatzënia, humbja e punës, pensioni dhe marrëdhëniet e dobëta ndërpersonale./CNN
