Komisioni i Pavarur për Media në Kosovë ka ndaluar transmetimin e një spoti parazgjedhor të Listës Serbe, për shkak të përdorimit të frazave “si të durojmë terrorin” dhe “ta rivendosim lirinë”. Sipas vendimit të KPM-së, këto terma përbëjnë shkelje të rendit kushtetues të Republikës së Kosovës.
Lajmin e ka bërë të ditur vetë nënkryetari i Listës Serbe, Igor Simiq, përmes një deklarate për Kosovoonline.
“Sapo jemi informuar nga mediat që ndjekin fushatën se është ndaluar sërish transmetimi i spotit të Listës Serbe. Kësaj radhe, Komisioni i Pavarur për Media është përfshirë drejtpërdrejt në kampanjën politike,” deklaroi Simiq.
Sipas tij, mediat që kishin planifikuar të transmetonin spotin janë njoftuar se përmbajtja e tij është në kundërshtim me rendin kushtetues të Kosovës, për shkak të përdorimit të termave që mund të konsiderohen nxitës ose destabilizues.
