Kryetari i Partisë Demokratike të Kosovës, Memli Krasniqi ka reaguar ashpër pas vrasjes së një gruaje sot në orët e mëngjesit në Pejë, ku i dyshuar është bashkëshorti i saj.
Krasniqi shprehet se dy gra u vranë në tri ditë nga partnerët e tyre të cilët kanë qenë edhe më parë të denoncuar në polici për çështje të dhunës në familje.
Ai thotë se ky është alarmi që duhet të zgjojë secilin person që ka sado pak përgjegjësi për të garantuar sigurinë e qytetarëve.
Tutje thekson ai se përgjegjësi për sigurinë është më së shumti e institucioneve shtetërore.
“Dy gra të vrara në tri ditë nga partnerët e tyre – të cilët kanë qenë edhe më parë të denoncuar në polici për çështje të dhunës në familje. y është alarmi që duhet të zgjojë secilin person që ka sado pak përgjegjësi për të garantuar sigurinë e qytetarëve – e institucionet shtetërore kanë më së shumti. Çfarëdo që është duke bërë aktualisht Qeveria e Kosovës, nuk është më e rëndësishme sesa siguria e grave në Kosovë”, shprehet Krasniqi.
Ai u bëri thirrje që urgjentisht të krijohet një task-forcë me kompetenca të plota për mbrojtjen e grave nga dhuna dhe vrasjet.
“Duhet vepruar pa justifikime dhe pa përjashtime. Pa pardon për recidivistët. Me ndëshkueshmëri maksimale për dhunuesit dhe vrasësit e grave. Duhet garantuar mbrojtje, mbështetje dhe siguri për gratë. Mos lejoni që Kosova të shndërrohet në një vend ku jeta e grave nuk vlen aspak. Lëvizni, ju lutem, sepse nuk është momenti për fjalë!”, theksoi Krasniqi.
