Kryeministri Albin Kurti gjatë zbulimit të shtatores së veprimtarit të çështjes kombëtare, Adem Demaçi, të dielën në Podujevë, ka thënë se Demaçi e ka kthyer lirinë në kusht të ekzistencës.
Kurti gjatë fjalimit të tij e ka quajtur Demaçin i përvuajturi më i fortë për përvojën më të madhe të dashurisë për liri.
Ai më tej ka përmendur edhe lirinë, duke thënë se kur diktatura nuk e kërcënon atë, duhet dyshuar te liria.
“Adem Demaçi e ngreh lirinë e vet mbi gjatësinë e trojeve, mbi gjeografinë e vullnetit. Adem Demaçi e ndau peshën e burgut me mendjen e të mëdhenjve të këtij kombi, andaj burgu nuk iu duk i rëndë. Kur diktatura nuk e kërcënon lirinë, duhet dyshuar te liria. Ky njeri i madh që sot ia lartësojmë në mënyrë solemne peshën e gurit, e ktheu lirinë në kusht të ekzistencës. Adem Demaçi prehet i qetë sepse jetoi përnjëmend. Kjo përmendore do të deklarojë para brezave një virtyt të dyfishtë të shoqërisë. Kjo përmendore është njëherësh shenja e guximit dhe barra e drejtësisë që ne i premtojmë vetvetes si garanci të një të ardhme që ja vlen. Përgëzime për këtë përmendore për të përvuajturin tonë më të fortë për përvojën më të madhe të dashurisë për liri”, është shprehur ai.
