Reagimet publike e shtynë të martën kryeministrin e Shqipërisë, Edi Rama, të kërkojë ndjesë për përdorimin e shprehjes “autizëm politik” në një deklaratë të bërë përgjatë ditës në fushatën elektorale.
Në një takim të zhvilluar më herët me pensionistët e qytetit të Gjirokastrës, teksa foli për zotimet e socialistëve në mandatin tjetër, kryesocialisti qortoi mbështetësit e Partisë Demokratike se nuk po e gjykojnë si duhet rëndësinë e zgjedhjeve të 11 majit. Ai sqaroi edhe termin “çyryk” të përdorur ditë më parë prej tij gjatë takimeve me gratë nëpër qarqe kundrejt simpatizantëve që i dallojnë ofertat politike vetëm sipas “ngjyrës së fanellës”.
“Më hidhen mua pse them gjysma e burrave janë çyrykë. Po ç’të them. E them si metaforë. Nuk është raport klinik. Për mua kush shkon në ‘kënetë’ është gjysmak. Të zgjedhësh midis BE-së dhe kënetës, kënetën d.m.th. nuk je mirë. Politikisht je autik. S’je mirë,” deklaroi kryesocialisti nga Gjirokastra.
Nëpërmjet një videoje të postuar në rrjetet sociale mbrëmjen e së martës, z. Rama u shpreh se ka reflektuar pas deklaratës.
“Të gabosh është njerëzore, ndërsa të mos kërkosh ndjesë kur gabon nuk është burrërore. Krejt padashje sot kam cenuar fëmijët autikë dhe me siguri kam lënduar prindërit e tyre, duke folur për autizëm politik, shprehje që diku me ka mbetur në mendje, sepse është përdorur shpesh edhe në literaturën politike akademike dhe më doli sot krejt padashje, por ja që u desh të gaboja pastaj të mësoja se prej vitesh konsiderohet e papërshtatshme dhe në fakt me plot të drejtë, prandaj kërkoj ndjesë dhe ju garantoj se kam jo respekt, por admirim për të gjithë prindërit e fëmijëve me aftësi të veçanta ose speciale, siç i quajmë, çka edhe më ka shtyrë të nxis dyfishimin e mbështetjes së tyre nga qeveria, gjë që e kam thënë në më shumë sesa një rast kohët e fundit dhe do të jetë pjesë e projektbuxhetit të vitit 2026,” tha z. Rama.
Rivali i tij kryesor në këto zgjedhje, kryedemokrati Sali Berisha, e quajti “të dënueshme” frazën e përdorur nga kundërshtari dhe një “superskandal”. Rama tha se shfrytëzimi politik që iu bë çështjes nga opozita do të marrë përgjigjen më 11 maj.
“Lehaqeniet që i kam nga pas dhe që u kapën pas fëmijëve autikë si i mbyturi pas fijes së barit për të fituar ndonjë pikë në sytë e atyre prindërve të nderuar, u jap fjalën që kjo do të jetë një motiv më shumë që ta shpenzoj çdo energji timen deri më 11 maj t’u japim mësimin më të merituar për të gjitha prapësitë e panumërta në kurriz të këtij vendi dhe në kurriz të këtij populli,” e përfundoi kryeministri Rama videomesazhin e tij.rtsh.
