Kryeministri Edi Rama deklaroi sot se Partia Socialiste nuk merr rolin e gjykatësit dhe nuk ka për të marrë kurrë rolin e prokurorisë, përkundrazi sa të jetë kjo parti dhe kjo shumicë qeverisëse prokurorët dhe gjykatësit mund të vazhdojnë të bëjnë punën e tyre të pavarur.
Në dëgjesën e Rektorit të Universitetit Bujqësor të Tiranës, Fatbardh Sallaku në grupin parlamentar të Partisë Socialiste, lidhur me 24 masat e sigurisë së vendosura nga SPAK ndaj stafit dhe pedagogëve të këtij universitetit, Rama u shpreh se nga ana tjetër “ne nuk jemi shurdhmemecë”.
“I kemi vënë në dispozicion organizmin e Partisë Socialiste sallës së operacionit kundër korrupsionit, të vazhdojë nuk ka asnjë problem. Atyre që thonë ua futën të gjithë ministrat në burg i them numëroni mirë se ju ka bërë Luli të gjithëve analfabetë. 12 vjet në qeveri, mbi 60 ministra, 2 janë nga mandati i parë të dënuar, një tjetër akoma në paraburgim pa gjyq, por është i fajshëm apo i pafajshëm e vendos gjykata. Dhe një tjetër është në arrati. Mund të ishin edhe të tjerë por gjithçka që ndodh është vepër e kësaj force këtu”, siguroi Rama.
Kryeministri theksoi se nëse sot ka një luftë frontale për të forcuar drejtësinë dhe për ta bërë edhe profesionale dhe europiane përveçse të pavarur, nëse sot erdhi dita se çfarë është drejtësia e pavarur kjo është vepra jonë dhe e askujt tjetër”.
Ndaj, theksoi kryeministri, në 20 maj duam një mandat shumë më të fortë sepse duam që këtë dritaren e hapur në rrethana historike për Europën ta shfrytëzojmë dhe brenda vitit 2027 të mbyllim negociatat.
Rama ritheksoi ambicien që brenda kësaj dekade Shqipëria të bëhet anëtare në BE edhe për shkak se ka krijuar një drejtësi të pavarur por edhe europiane. atsh
