Kryeministri në dorëheqje i Serbisë, Millosh Vuçeviq, është marrë me marrëveshjen e nënshkruar mes Kosovës, Shqipërisë dhe Kroacisë për mbrojtje.
Në platformën X, ai ka pyetur se kundër kujt është i menduar ky bashkëpunim, teksa shtoi se “tashmë është e qartë se “shteti i fortë i Serbisë është na përshtatet vetëm neve”.
“Shpresoj që tani të jetë e qartë për çdo qytetar të Serbisë se një shtet i fortë i Serbisë është i përshtatshëm vetëm për ne. Nëse nuk e mbrojmë dhe nuk e ndërtojmë, nuk na pret asgjë e mirë”, theksoi Vuçeviq me rastin e nënshkrimit të Deklaratës për Aleancën Ushtarake të Kosovës, Shqipërisë dhe Kroacisë dhe njoftimit të ministrit kroat të Mbrojtjes, Ivan Anushiq se ekziston mundësia që kjo aleancë të zgjerohet edhe në Bullgari në të ardhmen, raporton KK.
Vuçeviq ka pyetur gjithashtu në rrjetin social “X” se cili është interesi i dy anëtarëve të NATO-s për të hyrë në bashkëpunim ushtarak me Kosovën, të cilës i referohet si “institucione të panjohura që janë formuar ilegalisht në një pjesë të territorit serb” dhe pse një tjetër anëtar i NATO-s duhet t’i bashkohet tani një aleance të tillë.
Veç Vuçeviqit, reagim pati edhe nga MPJ-ja serbe, e cila tha se do të kërkojë sqarime shtesë nga Shqipëria dhe Serbia për këtë aleancë.
Ministri i Mbrojtjes i Kosovës, Ejup Maqedonci, tha se synimi i bashkëpunimit nuk është kërcënim për askënd, por mesazh për ata që synojnë të kërcënojnë rajonin.
“Synimi i këtij bashkëpunimi nuk është rast kërcënimi për askënd, mirëpo është mesazh për ata që synojnë të kërcënojnë sigurinë paqen dhe stabilitetin në Ballkanin Perëndimor por edhe sigurinë e vendeve tona. Tri vendet tona që ndajnë vlera dhe interesa të përbashkëta janë të bashkuara për t’u përballur me çdo kërcënim dhe rrezik që synon destabilizimin e regjionit. Rëndësia e këtij bashkëpunimi shtrihet edhe në rrafshe të tjera që u theksuan më herët nga dy ministrat, veçanërisht në industrinë e mbrojtjes, shkëmbimit të personelit, trajnimit dhe edukimit. Një ndër pikat kyçe të këtij dokumenti është që Kroacia dhe Shqipëria do të angazhohen në vazhdimësi për mbështetjen e Kosovës në proceset e saj të integrimit euro-atlantik. Ky dokument hap rrugë për bashkëpunim në veçanti për t’u përballur për rreziqet moderne që kërcënojnë sigurinë rajonale që janë kërcënimet hibride dhe të tjera. Hap rrugë që edhe vende të tjera t’i bashkëngjiten kësaj përpjekje tonë të përbashkët për paqe stabilitet dhe më shumë siguri”, tha ai.
Ndërkaq, ministri i Mbrojtjes i Shqipërisë, Pirro Vengu, tha se nënshkrimi i kësaj marrëveshje është një hap të rëndësishëm për forcimin e sigurisë dhe stabilitetit në rajon, si dhe për zhvillimin e kapaciteteve në përballimin e rreziqeve dhe sfidave të përbashkëta, shkruan KP.
“Deklarata përkthen jo vetëm një vullnet politik, por gjithashtu disa prioritete që ne ndajmë së bashku. Kryesisht ka të bëjë me rëndësinë që vendet tona i japin ri ngritjes së industrisë ushtarake dhe nevojën që në këtë shtyllë të sigurisë kombëtare vendet tona të bashkëpunojnë edhe më thellë dhe më gjerë. Pika e dytë ka të bëjë për bashkëpunimin që forcat tona të armatosura do të bëjnë, qoftë në stërvitje apo në kapacitete. Kosova dhe Shqipëria kanë çka të mësojnë nga një aleat i vyer si Kroacia. Kjo deklaratë çel sirtarin e një bashkëpunimi më të thelluar dhe kemi marrë interes edhe nga aleatë të tjerë që t’i bashkohen kësaj iniciative”, tha ai.
E ministri kroat i Mbrojtjes, Ivan Anushiq, tha se ky zhvillim strategjik pasqyron aleancën e ngushtë mes tri shteteve, të lidhura nga historia, sakrificat për liri dhe një vizion i përbashkët për një të ardhme të sigurt, transmeton Klankosova.tv.
“Për shkak të gjeopolitikës duam të kemi bashkëpunim në rajonin tonë duke pasur parasysh rreziqet që janë prezentë dhe situatat që po ndodhin në Evropë, duke iu referuar edhe Ukrainës. Jemi duke menduar edhe për të kaluarën tonë e cila nuk është shumë e largët. Një informacion që e kemi nga e kaluara dhe na jep mundësi për t’u menduar, prandaj kemi marrë vendimin që të kemi një bashkëpunim ndërmjet tre shteteve. Ky bashkëpunim do të bazohet sidomos te dhënia e ndihmës te pjesa e zhvillimit të industrisë së mbrojtjes, ndryshimit të përmbushjes së të gjithë marrëveshjeve që kemi firmosur deri tani. Këto tani duam t’i fuqizojmë dhe të ndajmë eksperiencën e shtetit tonë si Kroaci si pjesë e NATO-s dhe BE-së”, theksoi Anushiq.
Kjo marrëveshje trelaterale u konsiderua si e para në rajon.
