Kamir Khan, prokurori i Gjykatës Ndërkombëtare Penale (ICC), e krahasoi urdhër-arrestin ndaj Vladimir Putinit me ato kundër Radovan Karaxhiqit, Ratko Mlladiqit dhe Slobodan Millosheviqit.
Në një intervistë për BBC Rusia, Khan tha se pala ukrainase kërkoi një hetim mbi veprimet e Rusisë që në vitin 2021, kur ai u takua me kryeprokurorin ukrainas.
Megjithatë, Khan shpjegoi se në atë kohë ICC-ja kishte mungesë të burimeve dhe ai vetë kishte shumë përgjegjësi të tjera, pasi kishte marrë detyrën pak para udhëtimit në Ukrainë. Përveç kësaj, Khan nuk besonte se presidenti rus, Putin do të fillonte një luftë në shkallë të gjerë.
“Por kur ata e bënë, vendosa se ishte absolutisht e qartë se duhej të fillonim një hetim. Unë vizitova vendin e ngjarjes. Kur të dëgjoni historitë, shihni shkatërrimin dhe dëgjoni dëshmitë, duke përfshirë deklaratat e Vladimir Putinit dhe Maria Lvova- Belov (Komisionerja ruse për të Drejtat e Fëmijëve), nuk ishte e vështirë të zbatohej fuqia e plotë e ligjit.
“Kjo është shumë e trishtueshme. Rusia është anëtare e përhershme e Këshillit të Sigurimit, një vend i madh me letërsi, muzikë, një nga vendet themeluese të OKB-së, që luajti një rol jetik në fitoren ndaj fashizmit. Pra nuk më solli asnjë gëzim. Ishte një ditë e trishtuar kur u lëshua urdhër-arresti për presidentin e një vendi, një anëtar i rëndësishëm i Këshillit të Sigurimit”, tha Khan.
Në fillim të kësaj jave, Putin vizitoi Mongolinë, ku supozohej se do të arrestohej, por në vend të kësaj u prit me respekt.
Karim Khan pohoi se Mongolia do të duhet të shpjegojë pse e injoroi urdhrin e arrestit të ICC.
“Negociatat janë duke vazhduar në nivelin e gjykatës. Gjykatësit mund të bëjnë rekomandime në rast të mosbashkëpunimit, por unë nuk dua të parashikoj asgjë, sepse kjo çështje tani është midis gjyqtarëve dhe qeverisë së Mongolisë”, tha Khan.
Duke iu përgjigjur pyetjes nëse beson se Putini do të përfundojë ndonjëherë në bankën e të akuzuarve në Hagë, Khan iu referua Tribunalit për ish-Jugosllavinë.
“Njerëzit qeshën kur Tribunali për ish-Jugosllavinë lëshoi urdhër-arrestin për Karaxhiqin dhe Mlladiqin, Millosheviqin apo kur Gjykata Speciale për Sierra Leone lëshoi një urdhër arresti për ish-presidentin e Liberisë, Charles Taylor. Historia ka treguar se këta njerëz, të cilët dikur kishin fuqi të madhe në vendin dhe rajonin e tyre, përfunduan në bankën e të akuzuarve. Ka shembuj që tregojnë se nëse dikush sillet si të dojë, duke përdorur pushtetin në mënyrë të papërgjegjshme, hapësira e tij për manovrim zvogëlohet”, pohoi ai.
Gjykata Ndërkombëtare Penale (ICC) ka lëshuar urdhër-arresti për Putinin dhe Komisioneren Ruse për të Drejtat e Fëmijëve, Maria Lvova-Belova në mars të vitit 2023. Ata dyshohet se kanë kryer krime lufte gjatë pushtimit rus të Ukrainës. /TelegrafI.
