Kryetari i Prishtinës, Përparim Rama, ka reaguar për situatën e krijuar në rrugët e kryeqytetit për shkak të reshjeve të borës, duke bërë me dije se ekipet përgjegjëse janë angazhuar që rrugët të jenë të kalueshme pas reshjeve të borës.
Rama, thekson se situata po vështirësohet për shkak të borës që po bie pa ndërprerje.
“Të gjitha ekipet përgjegjëse janë angazhuar intensivisht dhe po punojnë pa ndërprerje për të siguruar që rrugët të jenë të kalueshme! Megjithatë, reshjet e dendura të borës që po vazhdojnë pa ndërprerje po e vështirësojnë situatën në terren”.
Kryetari Rama ka bërë thirrje te qytetarët për kujdes të shtuar në trafik dhe që të dalin me mjete të përshtatshme për këto kushte.
“Lusim qytetarët të tregojnë kujdes të shtuar gjatë lëvizjes, të përdorin mjetet e përshtatshme për kushtet atmosferike dhe të ndjekin udhëzimet e institucioneve kompetente”, tha Rama.
