Kryeministri në detyrë i Republikës së Kosovës, Albin Kurti, ka folur për projektin e ndërtimit të dy urave të reja mbi lumin Ibër, duke theksuar se gjithçka është duke u realizuar në përputhje me ligjin dhe në koordinim të plotë institucional.
Në emisionin “Këndi i debatit” në Tëvë1, Kurti tha se ndërtimi i këtyre urave është vendosur nga bordi i përbashkët i dy komunave, Mitrovicës së Veriut dhe Mitrovicës së Jugut, që përbëhet nga 10 përfaqësues.
“Gjithçka është sipas ligjit, me plan dhe vendim të dy komunave – të veriut dhe të jugut. Tashmë kanë edhe një bord të përbashkët. Ky bord ka marrë vendim. Unë kam përfaqësuesin Elbert Krasniqi, kryetari Bedri Hamza ka vendosur pesë përfaqësues dhe kryetari Erden Atiq po ashtu pesë. Tash do të ndërtohen dy ura dhe pritet që punimet të përmbyllen në vjeshtë të këtij viti. Kostoja është 3 milionë euro”, deklaroi Kurti.
Ai shtoi se ndërtimi i urave nuk është i kufizuar vetëm në Mitrovicë, por është pjesë e një vizioni më të gjerë zhvillimor në gjithë Kosovën.
“Duhet të ketë sa më shumë ura mbi Ibër. Natyrisht që nuk po bëjmë vetëm ura mbi Ibër – para disa ditësh isha në përurimin e një ure në Brdhosh, gjithashtu edhe në Prishtinë. Po bëjmë ura, po bëjmë edhe për arsim e për shëndetësi”, theksoi ai.
Lidhur me urën kryesore mbi Ibër, Kurti tha se ajo duhet të hapet, por se kjo varet nga zbatimi i marrëveshjes së Brukselit.
“Ura kryesore kam thënë se duhet të hapet, por nuk kam thënë se do të hapet menjëherë. Ne vazhdimisht bisedojmë që ajo duhet të hapet dhe unë besoj që do të hapet. Duhet të hapet. Është edhe marrëveshja e Brukselit që nuk po zbatohet. Ndërkohë, po ndërtojmë ura të reja.”
Kurti tha se tashmë në zonën e Mitrovicës janë 37 ura, dhe vetëm një prej tyre është ende e rrethuar me polici.
“Janë 37 ura atje – vetëm një është e rrethuar me polici. Strukturat ilegale të Serbisë i kemi shpartalluar, grupet kriminale i kemi mposhtur. Ka ende elemente kriminale, por nuk ka më struktura që e sfidojnë me sukses shtetin”, u shpreh Kurti.
