Barcelona e ka nisur fuqishëm këtë edicion të garave, me në krye trajnerin gjerman Hansi Flick.
Flick erdhi në krye të shtabit teknik të Barçës gjatë kësaj vere, duke e zëvendësuar Xavin e shkarkuar.
Nën drejtimin e gjermanit, Barcelona me plotë kuptimin e fjalës, po e shkel çdo kundërshtar, si në La Liga, ashtu edhe në Ligën e Kampionëve.
Në 12 ndeshjet e para në La Liga këtë edicion, klubi katalunas ka 33 pikë, duke marrë 11 fitore dhe vetëm një humbje.
Në Ligën e Kampionëve ka dy fitore dhe një humbje nga tri xhirot e para.
Por, përveç rezultateve të mira, duke mposhtur Bayernin e Real Madridin me nga katër gola të shënuar, Barçën e karakterizon edhe një lëvizje tjetër.
Është gracka e pozitës jashtëloje, duke luajtur me mbrojtjen goxha lartë në fushë, një lëvizjë e rrezikshme, por me përfitim të madh.
Duke marrë parasysh vetëm ndeshjen ndaj Real Madridit më 26 tetor, lojtari më i rrezikshëm i “Los Blancos”, Kylian Mbappe u zu tetë herë në pozitë jashtëloje.
Në përgjithësi, në La Liga dhe në Ligën e Kampionëve, Barcelona i ka zënë në pozitë jashtëloje 99 herë kundërshtarët.
Barcelona është ringjallur nën urdhërat e trajnerit gjerman, teksa po nxitë frikë te kundërshtarët para përballjeve me ta.
Ndeshjen e ardhshme, Barcelona e zhvillon këtë të mërkurë ndaj Yllit të Kuq të Beogradit në Ligën e Kampionëve.G.E.
