Kryeministri i Kosovës, Albin Kurti, e ka kujtuar trajnerin legjendar, Qiro Bllazheviq, pasi vdiq sot në moshën 87-vjeçare.
Bllazheviq kishte drejtuar edhe klubin kosovar KF Prishtina nga viti 1985, shkruan IndeksOnline.
Përmes një postimi në Facebook, Kurti thotë se trajneri kroat ka lënë kujtime të shumta në futbollin kosovar, duke thënë se e mban mend si fëmijë kohën se si e Bllazheviq e kishte bërë të famshëm KF Prishtinën.
Reagimi i plotë:
Qiro Bllazheviq, emër i shënuar në periudhën e gjeneratës së artë të KF Prishtina. Ai sot ndërroi jetë në moshën 87 vjeçare, duke lënë pas kujtime të shumta nga periudha kur futbolli kosovar kishte arritur kulmin e tij në vitet e ‘80-ta, derisa drejtonte me plot vetëbesim dhe entuziazëm ekipin e atëhershëm të KF Prishtinës. Si fëmijë, e mbaj mend qysh e pat bërë KF Prishtina aq të famshme. E pat sjellë në Prishtinë këngëtaren e njohur kroate, Tereza Kesovija. Para fillimit të një ndeshjeje të ligës elitare të vitit 1985 në Prishtinë, ajo doli në mes të fushës pranë kapitenit të atëhershëm Fadil Vokrri, për ta nisur ndeshjen formalisht, derisa të gjithë shikuesit në tribina mbanin shalla të bardhë, sepse kështu bënte vetë Mirosllav Qiro Bllazheviq.Në kujtesën e atyre që e kanë përcjellë futbollin e asaj kohe, Bllazheviq ka bërë vend si një trajner me pasion për futbollin dhe dashurinë e madhe për Prishtinën e Kosovën. Dhe i tillë do të mbetet përherë! Ngushëllime të sinqerta për familjarët dhe komunitetin futbolldashës.
