Pas vizitës në katër komunat veriore me shumicë serbe, kryeministri Albin Kurti, ka shprehur bindjen se e ardhmja e vendit është drejtë dhe përgjegjësia e të gjithve. Duke theksuar bashkëpunimin si rrugë drejt një të nesërme të ndritshme, ai gjithashtu përmendi vizitën në vendin ku u vra polici Afrim Bunjaku në Banjskë, përcjell KosovaPost.
“Sot vizitova katër komunat veriore me shumicë serbe, përfshirë vendin ku u vra polici ynë Afrim Bunjaku nga forcat paramilitare serbe shtatorin e kaluar. E ardhmja e vendit tonë është e drejtë dhe përgjegjësi e të gjithëve dhe së bashku do të punojmë për një të nesërme të ndritshme”, ka shkruar Kurti në platformën X.
Kryeministri Kurti gjatë vizitës në veri të vendit, ka deklaruar se është i nevojshëm nënshkrimi i Marrëveshjes Bazike në kuadër të dialogut me Serbinë, që të krijohet siguria ligjore dhe të fshihen të gjitha shkeljet e mëhershme.
Ndërsa, i pyetur nga mediat lidhur me deklaratat e zëdhënësit të BE-së, Peter Stano, se themelimi i Asociacionit të Komunave me shumicë serbe është kusht që duhet të zbatohet urgjentisht nga Kosova për të vazhduar progresin në rrugën evropiane, Kurti ka thënë se ajo çfarë duhet të zbatohet e nuk po respektohet është Marrëveshja Bazike e 27 shkurtit të vitit të kaluar.
Ai ka theksuar se përqendrimi duhet të jetë te Marrëveshja Bazike, e cila, sipas tij, “nuk duhet të shkelet”, por “duhet të respektohet dhe duhet të zbatohet”.
