Kryeministri i vendit, Albin Kurti, tha se pranimi i planit të emisarëve perëndimor të enjten në Bruksel, është mundësi e mirë që Kosova të kërkojë më shumë siguri në kufirin me Serbinë.
Gjatë mbledhjes së radhës të Qeverisë, Kurti shtoi se pjesë e diskutimit gjatë takimit në Bruksel, ishte edhe një propozim tjetër me plan më gjithëpërfshirës për marrëveshjen bazike.
“Iu përgjigjëm pozitivisht sepse e konsideruam atë si mundësi të mirë për të kërkuar nga krerët e Bashkimit Evropian, më shumë siguri në kufirin e Kosovës me Serbinë, i cili është 381 kilometra i gjatë. Por, edhe për të diskutuar më tej propozimin e tyre për një paketë më të plotë të zbatimi gjithëpërfshirës të marrëveshjes bazike, pjesën integrale të kësaj marrëveshje, e që është aneksi I zbatimit dhe bashkërisht edhe me një draft të propozuar për zbatimin e nenit 7 të marrëveshjes bazike”, theksoi Kurti.
Kujtojmë që Kurti është dakordësuar që plani i emisarëve perëndimorë, i prezantuar ditë më parë, të jetë kornizë për bisedimet e mëtejshme me Shtetet e Bashkuara, Gjermaninë, Francën dhe Italinë.
