Kryeministri i vendit, Albin Kurti, është deklaruar në lidhje me zhvillimet e fundit të cilat ndodhën në veriun e Kosovës.
Kurti tha se Policia e Kosovës do të ndërhynte para festës së Viti të Ri, për t’i larguar barrikadat, nëse ato nuk do të hiqeshin.
Kurti tha se KFOR-it iu dha koha e nevojshme dhe e kërkuar për heqjen e tyre.
Sipas Kurtit, Qeveria e Kosovës nuk e dëshironte ndërhyrjen policore.
“Policia jonë do të ndërhynte para Vitit të Ri, nëse nuk do të tërhiqeshin barrikadat”,deklaroi Kurti në një intervistë për Zërin e Amerikës.
Ai tha se krejt çka ka dhënë Qeveria e Kosovës është koha shtesë për KFOR-in, teksa shtoi se gjatë gjithë kohës ka pasur komunikime me ambasadën amerikane, ambasadorët e QUINT-it, KFOR-in e EULEX-in.
“Kemi pasur komunikime me ambasadën amerikane, ambasadorët e QUINT-it e sidomos me KFOR-in e EULEX-in, por ne s’kemi ofruar asgjë në shkëmbim, përveç kohës shtesë për KFOR-in dhe gjithashtu ishte e qartë që ato barrikada u ngritën nga struktura ilegale të Serbisë që u shndërruan në banda kriminale pikërisht në kohën kur ne u dakorduam që t’i shtyjmë për prill të vitit 2023 zgjedhjet në 4 komunat në veri. Në një mënyrë, atëherë kur ne e bëmë një koncesion, ata i ngritën barrikadat sepse kishin ngelur pa pretekst.
Po ashtu ai tha se është mirë që ata të cilët i kanë vendosur barrikadat, i larguan vetë.
“Bindja ime është që ata i vendosën barrikadat nga frika dhe nga frika edhe i kanë hequr”, shtoi tutje Kurti.
I pari i Qeverisë së Kosovës tha njashtu se Serbia është vend armik në veri dhe se Kosova nuk duhet të përfundojë në qëndrim vetëfajësues.
“Duhet ta kuptojmë që në veri e kemi një shtet armik, që nuk e ndryshon kushtetutën, me ato bazat ofensive. Do të ishte gabim i madh të hyjmë në tezën e vetëfajësimit, kur kemi një Serbi”, shtoi Kurti.
