Kryeministri i Republikës së Kosovës, Albin Kurti, priti sot në takim lamtumirës shefen e zyrës së UNICEF-it në Kosovë, Nona Zicherman, përcjell KosovaPost.
Sipas njoftimit nga Qeveria, gjatë këtij takimi, kryeministri Kurti vlerësoi përkrahjen e vazhdueshme të UNICEF-it në përpjekjet e përbashkëta për zhvillimin shoqëror dhe falënderoi shefen e zyrës, Zicherman, për punën e saj të rëndësishme gjatë misionit në Kosovë, sidomos në fushën e edukimit.
Duke folur për qeverisjen, kryeministri theksoi angazhimin e tij dhe kabinetit të ministrave për shoqëri të barabartë, promovim të të drejtave të njeriut dhe komuniteteve joshumicë, zhvillimi të gjithëmbarshëm dhe arsimim cilësor.
Teksa u diskutua për masat dhe reformat e ndërmarra nga Qeveria, kryeministri përmendi suksesin të platformës “SuperPuna” me punësimin e 10 mijë të rinjve e të rejave të grupmoshës 18-25 vjeçare, e cila nga shkurti i këtij viti është zgjeruar edhe për të rinjtë deri në moshën 29 vjeç.
Si një element kyç në realizimin e prioriteteve të Qeverisë dhe projekteve të përbashkëta u konsiderua edhe bashkëpunimi i mirë ndërmjet ministrive dhe UNICEF-it.
Ky lloj i bashkëpunimit të afërt, u tha se do të vazhdojë të realizohet edhe me shefin e ri në ardhje që pritet të filloi misionin në qershor të këtij viti.
