Deputetët e Kuvendit të Kosovës pritet të mblidhen sërish për të vazhduar seancën e konstituimit, e cila ishte ndërprerë të shtunën, pasi kandidatja e propozuar nga Lëvizja Vetëvendosje për kryeparlamentare, Albulena Haxhiu në dy tentime nuk mori votat e mjaftueshme.
Vazhdimi i seancës do të bëhet me përpjekjen e tretë për zgjedhjen e kryeparlamentarit dhe nënkryetarëve.
Sipas gazetareve të RTK-së, të cilat ndodhen në ambientet e Kuvendit të Kosovës, tashmë kanë filluar të arrijnë deputetët.
Të shtunën është realizuar me sukses përpjekja e tretë për konstituimin e Kuvendit të ri, pasi raporti i Komisionit për verifikimin e mandateve u miratua dhe deputetët bënë betimin. Megjithatë, procesi ka hyrë në një fazë të re bllokade kur në rend dite erdhi zgjedhja e kryetarit të Kuvendit.
Lëvizja Vetëvendosje propozoi deputeten Albulena Haxhiu për këtë post, por ajo nuk arriti të sigurojë numrin e nevojshëm të votave – mori vetëm 57 nga 61 vota që kërkohen për t’u zgjedhur. Për Haxhiun votuan 48 deputetët e LVV-së dhe 9 përfaqësues të komuniteteve jo-shumicë. Ndërkohë, 20 deputetët e LDK-së votuan kundër, ndërsa 3 deputetët e Nismës abstenuan. Deputetët e PDK-së, ata të Listës Serbe, si dhe Duda Balje dhe Adem Hoxha, nuk morën pjesë në votim.rtk.
