Ndërmjetësuesi i BE-së për dialogun, Miroslav Lajçak, ka shkruar për rastin e djeshëm në veri, ku një polic mbeti i vrarë dhe një tjetër u plagos si pasojë e një sulmi terrorist ndodhi ndaj tyre.
Lajçaku nuk e cilësoi aktin e djeshëm si sulm terrorist, ndërsa foli për domosdoshmërinë e dialogut parandalues të dhunës.
“Me t’u kthyer nga New Yorku këtë mëngjes, më takoi lajmi tronditës për një sulm ndaj policëve të Kosovës në veri të Kosovës. Një akt i tillë frikacak i dhunës është thellësisht shqetësues dhe është në kundërshtim me vetë parimet e paqes dhe bashkëpunimit. Zemra ime është me viktimat, familjet, miqtë dhe kolegët e tyre. Ky sulm i tmerrshëm thekson më tej domosdoshmërinë e diplomacisë dhe dialogut parandalues, nënvizuar gjatë javës së kaluar, kur mora pjesë në javën e nivelit të lartë të Asamblesë së Përgjithshme të OKB-së në New York”, ka shkruar Lajçaku.
Emisari i BE-së ka shtuar se në margjinat e javës së nivelit të lartë ka diskutuar me drejtues dhe kolegë të shumtë nga e gjithë bota.
Në një mënyrë apo tjetër, ne të gjithë theksuam rëndësinë e dialogut dhe bashkëpunimit. Takova gjithashtu gjashtë presidentët nga Ballkani Perëndimor dhe zyrtarë të lartë të OKB-së, për të diskutuar mbi dinamikat rajonale. HR/VP Borrell organizoi gjithashtu një drekë tradicionale të Ballkanit Perëndimor për të harmonizuar mesazhet tona për këtë javë në skenën globale. Për të gjetur një rrugë përpara në rajon dhe në veçanti në Dialog, mbajta diskutime strategjike me partnerët tanë amerikanë”, ka shkruar tutje Lajçak.
