Lautaro Martinez po i afrohet gjithnjë e më shumë Barcelonës. Jo ende në kuptimin praktik, sepse zgjatjen në muskujt e pasmë të kofshës së majtë e detyron të jetë tepër i kujdesshëm të paktën deri të martën në orën 21:00, por në kuptimin emocional, kapiteni i Interit ndihet tashmë pjesë e ndeshjes.
Lautaro e di që do të jetë në “San Siro”, e ndien se do të zbresë në fushë, dhe minutazhi do të varet nga një kombinim mes ndjesive të tij, vlerësimit të Simone Inzaghit dhe stafit mjekësor, si dhe peshës që ka kjo ndeshje drejt finales së madhe të Ligës së Kampionëve.
Të dielën në mbrëmje, “El Toro” publikoi në Instagram një foto të fuqishme: i kthyer me shpinë, duke treguar muskujt gjatë stërvitjes. Bashkë me foton, vetëm dy emojy për të treguar se “ka mbetur pak kohë”, dhe një bateri për të treguar se “po karikohet për ndeshjen”.
Një mesazh kaq i qartë, saqë edhe partneri i tij në sulm, Marcus Thuram, iu përgjigj në mënyrë simbolike me një orë alarmi, duke përforcuar idenë që rikthimi i dyshes “ThuLa” është vetëm çështje kohe.
Dilema për nisjen nga minuta e parë
Sot pritet testi vendimtar që do të përcaktojë grumbullimin dhe ndoshta edhe aktivizimin e Lautaros që nga minuta e parë. Edhe pse nuk është stërvitur me grupin ditët e fundit, kjo nuk përbën problem për një lojtar që është hallkë kyçe e një mekanizmi që e njeh përmendësh. Në këtë fazë të sezonit, me vetëm katër ose pesë ndeshje të mbetura, rëndësi ka më shumë prania sesa forma maksimale fizike.
Nëse nuk do të jetë gati për titullar, atëherë do të jetë Mehdi Taremi ai që do të nisë nga fillimi. Por për Inzaghin, fakti që mund të kthejë kokën nga stoli dhe të shohë fytyrën e Lautaros të gatshëm për të hyrë në lojë, është një avantazh psikologjik i jashtëzakonshëm, që mund të bëjë të gjithë diferencën në një ndeshje që vlen finalen e Champions-it. s.n.
