Ministri i Jashtëm rus Sergei Llavrov njoftoi se nesër në Istanbul do të mbahet një takim i delegacioneve ruse dhe amerikane për të diskutuar mbi punën e ambasadave.
“Diplomatët dhe ekspertët tanë të lartë do të takohen dhe do të diskutojnë problemet sistematike që janë grumbulluar si rezultat i aktiviteteve të paligjshme të administratës së mëparshme amerikane për të krijuar pengesa artificiale për aktivitetet e ambasadës ruse, ndaj së cilës ne, natyrisht, u kundërpërgjigjëm dhe krijuam kushte të pakëndshme për punën e ambasadës amerikane në Moskë”, u tha Llavrov gazetarëve në Doha.
Duke komentuar situatën në Lindjen e Mesme në kontekstin e konfliktit izraelito-palestinez, Llavrov tha se Rusia është thellësisht e shqetësuar që ushtria izraelite vazhdon të ndërmarrë veprime që shkojnë përtej marrëveshjes së armëpushimit, duke krijuar tensione në terren.
“Rusia dhe Katari mbështesin përparimin drejt krijimit të një shteti palestinez, ndërsa e shohin zhvendosjen e palestinezëve në rajon si një bombë e kurdisur”, tha Llavrov.
Llavrov gjithashtu hodhi poshtë mundësinë e vendosjes së trupave evropiane në Ukrainë, duke thënë se presidenti francez Emmanuel Macron kishte keqinterpretuar deklaratat e presidentit amerikan Donald Trump.
Ai shtoi se Trump sugjeroi se një veprim i tillë mund të ishte i mundur me pëlqimin e të gjitha palëve, por pëlqimi i Rusisë nuk u kërkua kurrë.
