Ministri i Jashtëm rus Sergei Lavrov tha sot se Moska nuk do të ndalojë së luftuari në Ukrainë derisa të arrijë atë që kërkon përmes negociatave për t’i dhënë fund luftës, të cilat janë iniciuar nga presidentët e SHBA dhe Rusisë.
“Ne nuk do të ndalojmë armiqësitë derisa këto negociata të arrijnë një rezultat të qartë dhe të qëndrueshëm që i përshtatet Federatës Ruse”, u tha Lavrov gazetarëve gjatë një konference të përbashkët shtypi me homologun e tij turk Hakan Fidan në Ankara.
Moska kërkon dorëzimin e ushtrisë ukrainase dhe kërkon që Kievi të dorëzojë pesë provinca brenda territorit të tyre që kontrollohen plotësisht ose pjesërisht nga forcat ruse. Në të njëjtën kohë, Rusia dëshiron që Ukraina të angazhohet që të mos anëtarësohet në NATO dhe të ketë një qeveri të re.
“Të dyja palët duhet të marrin pjesë në bisedimet e paqes midis Ukrainës dhe Rusisë”, tha kryediplomati turk Hakan Fidan.
“Ndërsa po hyjmë në vitin e katërt të luftës sot ne i kushtojmë rëndësi të madhe nismës së re amerikane. Ne besojmë se mund të gjendet një zgjidhje përmes negociatave në të cilat do të marrin pjesë të dyja palët. Turqia është gjithmonë e gatshme të marrë rolin e ndërmjetësit. Qëllimi ynë është t’i japim fund kësaj lufte shkatërruese sa më shpejt të jetë e mundur dhe të mbyllim plagët në rajon”, theksoi ai, shkruan A2CNN.Turqia, edhe pse një anëtare e NATO-s, ka ruajtur lidhjet e saj me Moskën dhe Kievin që nga fillimi i luftës. Ajo u ofron dronë ukrainasve, por nuk ka miratuar sanksionet kundër Rusisë të vendosura nga Perëndimi.
