Zëdhënësi i Lëvizjes Vetëvendosje, Arlind Manxhuka, ka reaguar pasi që Gjykata Supreme e Kosovës e hodhi poshtë si të palejuar ankesën e këtij subjekti politik.
Kjo parti politike ishte ankuar kundër vendimit të Panelit Zgjedhor për Ankesa dhe Parashtresa lidhur me Listën Serbe.
“Nëse ka një emërues të përbashkët kundër Qeverisë, brenda dhe jashtë Kosovës e veçanërisht në Beograd, ai është: VETËVENDOSJE! nën 50%. Ky është emëruesi dhe kushti elementar që duhet arritur nga të gjithë këta në mënyrë që të çlirohen nga vuajtjet që Qeveria e Kurti e VETËVENDOSJE! i kanë shkaktuar këtyre për 4 vite mandat”, ka shkruar Manxhuka në Facebook.
Sipas tij, e gjithë kjo betejë ‘përkthehet në hapat konkretë dhe praktik. E hapi i parë është edhe insistimi që gjithsesi të përfshijnë Listën Serbe në zgjedhje si partnerë potencial të një situate të VV-së nën 50%’.
“Por, të trajtohet Lista Serbe vetëm juridikisht dhe formalisht, subjekt ky që jo vetëm që nuk e njeh Republikën e Kosovës, jo vetëm që i referohet asaj në terminologji të regjimit të Serbisë, por deklaron që nuk do ta njeh atë kurrë dhe për më keq nuk e ka bërë asnjë lloj distancimi nga të bëma e nënkryetarit të saj, Milan Radojçiq dhe nuk ka kërkuar falje për asnjë krim që është bërë në veri të vendit”, shkruan tutje Manxhuka.
Sipas tij Republika e Kosovës, institucionet e saj, nuk do të duhej të ishin lehtësisht të kalueshme për këso lloj luftimi e fyerje që i bëhet vet asaj dhe institucioneve të veta.
“Institucionet e Kosovës janë krijuar me shumë gjak e sakrificë dhe nuk do të duhej që kaq lehtësisht të shkelej mbi integritetin dhe dinjitetin e tyre”, ka shkruar Manxhuka.
