Sekretari i Përgjithshëm i NATO-s, Mark Rutte, gjatë konferencës së sotme për media, para takimit të ministrave të Jashtëm të vendeve anëtare të NATO-s, deklaroi se Aleanca për më shumë se dy vjet kërkon llogaridhënie për sulmin terrorist në Banjskë dhe sulmin ndaj personelit të KFOR-it në Zveçan gjatë vitit 2023.
Rutte theksoi se për këto raste janë ndërmarrë përpjekje të vazhdueshme për të siguruar që përgjegjësit të dalin para drejtësisë.
“Paraardhësi im ka punuar për këtë me presidentin e Serbisë, Aleksandar Vuçiq. Unë po ashtu kam punuar vetë. Ai më premtoi se do të punonte në këtë çështje dhe do të jepte rezultate. Ne i bëjmë thirrje autoriteteve serbe që të luajnë rolin e tyre në këtë drejtim”, theksoi Rutte.
Duke folur për dialogun midis Serbisë dhe Kosovës, Rutte shtoi se ai udhëhiqet nga Bashkimi Evropian. “Ne e ndjekim këtë nga afër, dhe sigurisht, NATO është e përfshirë indirekt përmes KFOR-it. Përpiqemi të jemi sa më të dobishëm të jetë e mundur edhe në këtë çështje”, tha ai.
Shteti i Serbisë, më 25 shtator 2023, përmes një grupi terrorist të udhëhequr nga krimineli Milan Radoiçiq kreu një sulm agresioni në Banjskë të Zveçanit, ku mbeti i vrarë polici i Kosovës, Afrim Bunjaku. Ndaj 45 pjesëtarëve të këtij grupi, Prokuroria Speciale e Kosovës ka ngritur aktakuzë.
Gjithashtu, 93 pjesëtarë të KFOR-it u lënduan, disa prej tyre rëndë, gjatë protestës së dhunshme të serbëve në maj të vitit 2023 në Zveçan, të cilët nuk pranonin vendosjen e kryetarëve shqiptarë në objektet komunale.
