Policia e Kosovës ka arrestuar një person i dyshuar për falsifikim të parasë, pas zbatimit me sukses të Urdhëresës për “Masa të fshehta hetimore”, përcjell Kosova Post.
Policia gjithashtu njofton se në aksionin “blerja e simuluar”, ka konfiskuar mbi 10 mijë euro, të cilat dyshohen se janë të falsifikuara.
Sipas PK-së, kapja e kësaj shume është bërë e mundur pasi hetues të krimeve ekonomike kanë realizuar një aksion simulues për blerjen e asaj shume të parave të falsifikuara për 6 mijë euro.
Njoftimi i plotë i Policisë së Kosovës:
Arrestohet një i dyshuar për përfshirje në ‘falsifikim parash’ dhe konfiskohen mbi 10 mijë euro që dyshohet të jenë të falsifikuara
Prishtinë 16.03.2024
Hetuesit policorë nga Drejtoria për Hetimin e Krimeve Ekonomike dhe Korrupsionit, përkatësisht nga Sektori për Hetimin e Krimeve Ekonomike, më 15.03.2024 kanë zbatuar Urdhëresën për ‘Masa të fshehta hetimore’, përkatësisht ‘Blerja e simuluar e artikujve, shërbimeve ose sendeve’, të lëshuar më 14.03.2024 nga Prokuroria Themelore Prishtinë.
Gjatë zbatimit të urdhëresës, në fshatin Shakovicë të Podujevës, i dyshuari A.A., (viti i lindjes 1987, mashkull kosovar), gjatë realizimit të masave të fshehta të hetimit nga hetuesit policorë, ka ofruar për shitje 5000 copë monedha nga 2 euro (5000×2=10000). I dyshuari këtu monedha synonte t’i shiste për 6 mijë euro.
Policia, gjatë kontrollit në veturën e tij, kanë gjetur dhe sekuestruar:
- 5000 x 2 € monedha, dyshohet të jenë të falsifikuara,
- 3 kartëmonedha nga 20 euro, dyshohet të jenë të falsifikuara,
- Vetura e përdorur nga i dyshuari dhe
- Një telefon celular.
I dyshuari është intervistuar në prezencën e avokatit mbrojtës të caktuar sipas detyrës zyrtare. Me aktvendim të prokurorit kujdestar, i dyshuari dërgohet në mbajtje për 48 orë./Kosova Post/
