Ish-ministri i Mbrojtjes, Armend Mehaj, ka bërë thirrje për reagim të gjerë qytetar dhe institucional kundër asaj që ai e quan padrejtësi ndaj Kosovës dhe luftës çlirimtare, përmes Dhomave të Specializuara në Hagë, përcjell Kosova Post.
Mehaj thekson se “padrejtësia mbetet padrejtësi” dhe se është e nevojshme rikthimi i protestave paqësore, ashtu si para luftës, me angazhimin e të gjithë qytetarëve, si brenda ashtu edhe jashtë vendit. Sipas tij, edhe përfaqësitë diplomatike dhe ambasadat e Kosovës duhet të përdoren për të kërkuar drejtësi pa hezitim.
Ai rikujton se Serbia ka kryer krime të gjenocidit në Kroaci, Bosnje e Hercegovinë dhe Kosovë, duke shtuar se, sipas tij, ajo vazhdon edhe sot politika shtypëse ndaj shqiptarëve të Kosovës Lindore. Mehaj shpreh shqetësimin se në Ballkan nuk po gjykohet Serbia për këto krime, por po kërkohet dënimi i viktimave, në këtë rast i Kosovës.
Sipas ish-ministrit, Evropa ka obligim moral dhe politik të vendosë drejtësi për Kosovën, ndërsa dënimi i ish-krerëve të UÇK-së e cilëson si të papranueshëm. Ai shton se Kosova ka qenë dhe mbetet në anën e drejtë të historisë, duke theksuar se roli i Shteteve të Bashkuara të Amerikës mbetet kyç në mbrojtjen e së drejtës./KosovaPost/
