Negociatat për rinovimin e kontratës së Tijjani Reijnders me Milanin po shkojnë në drejtimin e duhur. Mesfushori holandez, i cili është kthyer në liderin teknik të skuadrës së Paulo Fonsecas, ka konfirmuar vlerën e tij në performancat e fundit, përfshirë atë në ndeshjen e Kupës së Italisë.
Në një intervistë me ‘Ziggo Sport’ (medie holandeze), Reijnders tha:
“Ende nuk kam firmosur, por duket një gjë e bukur. Është një shpërblim i madh që Milani dëshiron të më japë, pasi zgjatja e kontratës pas vetëm një viti nuk ndodh shpesh. Është një klub i madh për të luajtur.”
Situata e kontratës dhe e ardhmja
Milani synon ta “blindojë” Reijnders për të shmangur interesimet nga klube të tjera, veçanërisht nga Premier League. Mes tyre, përmendet Manchester City, që mund të kalojë në një fazë të re ndërtimi teknik gjatë verës. Rinovimi i tij shihet si një masë paraprake për të ruajtur stabilitetin në ekip.
Gjithashtu, sigurimi i kualifikimit në Ligën e Kampionëve mbetet një faktor vendimtar për të mbajtur të kënaqur lojtarët kyç dhe për të shmangur humbjet ekonomike e sportive që do të vinin nga mungesa e pjesëmarrjes në kompeticionin më të rëndësishëm europian.
