Ministri i Financave, Hekuran Murati, ka folur për ankesat e kryetarit të komunës së Suharekës, Bali Muharremaj, i cili tha se dje janë njoftuar nga institucionet e nivelit qendror se i janë bllokuar qasjet për të gjithë zyrtarët financiarë si komunë e Suharekës, derisa të procedohet vendimet gjyqësore/përmbarimore.
Murati tha se ankesat janë në adresë të gabuar dhe sipas tij, ka tendencë që të shfrytëzohen për sulme politike ndaj qeverisë.
“Në vazhdimësi kemi parë, qoftë nga eksponentë nga Asociacioni i Komunave apo edhe nga niveli komunal që të tentohet të bëhet bartja e fajit”.
“Qeveria nuk bllokon llogari. Nëse ka shkuar njoftimi prej Thesarit se po bllokohen llogaritë, dhe të thuhet se Thesari i ka bllokuar llogaritë, është ngjashëm si të pretendohet se kur të vjen mesazhi se të ka dalë paga në bankë, banka ta ka qitë pagën, a në fakt punëdhënësi ta ka qitë pagën, por banka vetëm të njofton”, tha Murati, njofton Klankosova.tv.Tutje, Murati tha se bllokimet bëhen nga përmbaruesit dhe urdhrat e formës së prerë të gjykatave, teksa shtoi se “as tendencë politike nuk ka këtu e as nuk është obligim i qeverisë”.
