Plani i Ramës për Kalabrinë kaloi në Kuvendin Komunal, por jo edhe në Ministri.
Kërkesa e Komunës së Prishtinës për Planin e Hollësishëm Rregullues për këtë lagje ka ngecur në Ministri të Mjedisit, Planifikimit Hapësinor dhe Infrastrukturës, ani pse afati i rregullt për një përgjigje nga ana e këtij dikasteri ka përfunduar më 26 qershor të 2024-ës.
Mirëpo, një përgjigje për këtë plan Ministria e pati për Kiks Kosovën.
Nga ky dikaster i thanë emisionit se vendimet për këtë plan rregullues nuk kanë qenë në rregull.
Sipas kësaj ministrie, Komuna duhet ta përmbyll procesin e hartimit të Planit Zhvillimor të Komunës dhe Hartës Zonale të Komunës, në të cilën do të përcaktohen zonat për hartimin e Planeve Rregulluese të Hollësishme, e tek më pas të adresojë në ministri kërkesa për lagje të veçanta.
Megjithatë, plani rregullues për Kalabrinë nuk është projekti i vetëm me defekti i Ramës.
Edhe vetë Plani Zhvillimor i Kryeqytetit i cili duhet të hartohet para planeve rregullues për secilën lagje, nuk mori aminin e Ministrisë së Mjedisit.
Më 19 janar të këtij viti, Komuna e Prishtinës kërkoi nga Ministria e Liburn Aliut që të bëjë vlerësimin e Planit Zhvillimor të kryeqytetit, për hapje të shqyrtimit publik.
Më shumë se dy muaj më vonë, më 27 mars, Ministria i ktheu përgjigje Komunës, sipas të cilës, Departamenti për Planifikim Hapësinor, Ndërtim dhe Banim i kësaj ministri gjeti 28 vërejtje administrative, ligjore dhe substanciale.
Sipas konstatimit të Ministrisë, Komuna e Prishtinës ka hartuar raportin për vlerësimin strategjik mjedisor për Planin Zhvillimor Komunal të Gjakovës.
Prandaj, nga ky dikaster i kanë rekomanduar Komunës së Prishtinës që të hartojë raportin për vlerësimin strategjik mjedisor për Planin Zhvillimor Komunal të Kryeqytetit.
Ministria i bëri vërejtje Komunës edhe për disa ndryshime në këtë plan, pa një kërkesë a ndonjë arsyetim, të cilat vlerësoi se janë bërë kundërligjshëm.
Me këtë plan, pushteti qendror vlerësoi se do të dëmtohen tokat bujqësore të cilësisë së lartë.
Ministria gjeti po ashtu se ky projekt ka zgjeruar kufirin e zonave për ndërtim duke ndërhyrë edhe në zonat nën mbrojtje të natyrës, ujërave dhe tokës nën sistemin e ujitjes.
Edhe zgjerimi i vendbanimeve në pjesën veriore të Komunës, që parashihet me këtë plan, sipas Ministrisë bie ndesh me Ligjin për Tokën Bujqësore dhe me Planin Hapësinor të Kosovës.
Në fund të raportit me 28 vërejtje, Ministria kërkoi nga Komuna e Prishtinës që gjatë hartimit të Planit Zhvillimor Komunal të Kryeqytetit, t’i respektojë dispozitat ligjor, sipas Ligjit për Planifikim Hapësinor dhe udhëzimet administrative në fuqi./kk