Ditë më parë është raportuar se jo më pak se 7 mijë e 500 euro është paga e një personi me emrin, Gani Jakupi, i cili paguhet nga Qeveria e Kosovës për pozitën këshilltar në Ministrinë e Punëve të Jashtme dhe Diasporës, dikaster ky i cili udhëhiqet nga ministrja Donika Gërvalla.
Këtë çështje e ngriti sot në komision edhe deputetja e PDK-së, Ariana Musliu-Shoshi, e cila bëri kritika të shumta duke përdorë këtë rast.
“Kemi kërcënime të vazhdueshme nga Serbia. Ju si ministre nuk vini në Komision që të na tregon se çka janë duke bërë misionet tona. Jeni një ministre që jeni nën masa të BE-së. Keni paguar këshilltar të jashtëm 7 500 euro, pagë më e madhe se sa rrogat e Policisë së Kosovës. Na tregon se çka jeni duke bërë me këtë buxhet. Të lutem përgjigju në një pyetej konkrete a paguhet Gani Jakupi 7 500 euro në muaj”, tha mes tjerash në kritikat e aj Musliu-Shoshi.
Mirëpo vetë ministrja Gërvalla e ftuar sot për të raportuar në mbledhjen e Komisionit për Punë të Jashtme dhe Diasporë ka demantuar deputetët e opozitës dhe disa media, duke sqaruar se Jakupi nuk është këshilltar i saj.
Ajo ka thënë se edhe shuma prej 7500 euro për Gani Jakupi nuk është pagë mujore, por një projekt 1 vjeçar për angazhim të tij në vendet jo njohëse të Kosovës.
Në këtë rast, ministrja Gërvalla ia kujtoi deputetes Musliu-Shoshi se partia e saj, PDK-ja, ka bërë kontrata e pagesa edhe 50 fish më shtrenjtë për shërbime të njëjta.
Gërvalla, gjatë raportimit në Kuvend për ndarjet buxhetore të dikasterit të saj tha se shumica e mjeteve do të orientohet në lobim për njohje të reja, blerje të objekteve të ambasadave në disa vende si dhe hapje të misioneve të reja diplomatike.
“Jam shumë krenare që në këtë shumë modeste e cila nuk është pagë mujore, por që i përfshin shpenzimet e projektit njëvjeçar, në Afrikë e në shtete tjera…me shumë kënaqësi vij e ju tregoj këtu për këto kontrata. Në vend që të hidhet baltë në imazhin e personaliteteve të rëndësishme, ky vend do të duhej t’i falënderonte ata për përkushtimin. Nuk ka asnjë dilemë dhe asnjë mister rreth kontratës që është lidhur në misionin tonë.
Ai nuk është këshilltar i imi, por pjesë e projektit. Për të më sulmuar mua, po përdorni emrat e personaliteteve…nevojitet një përkushtim si opozitë, jo për të hedhur baltë, por për tu marr me tema serioze. Ju lus për më shumë dinjitet dhe kujdes kur flisni për personalitete të shquara të kulturës, përmes mediave familjare dhe personale”, tha Gërvalla.
Ajo ka shtuar se për këto kontrata milionëshe nga qeverisjet e kaluara nuk mund të flas tani sepse atë kohë të qeverisjes së PDK-së ishin bërë dokumente konfidenciale, porse posa të deklasifikohen do të dalin të gjitha sheshit dhe do të kuptohen keqpërdorimet e shumta që janë bërë.
