Gjenetisti, Prof. Dr.Adem Salillari ishte sot në Shqip nga Rudina Xhunga në DritareTv dhe foli për rolin e përmirësimit gjenetik në prodhimin e farës së grurit dhe misrit, një teknologji që po zhvillohet dhe duhet të vazhdojë në Shqipëri dhe Kosovë. Shkencëtari tha se kushtet janë krijuar dhe kjo punë do ecë. Ne nuk duhet ta marrim grurin nga Serbia tha zoti Salillari dhe të hamë bukë pa proteina, pa vlera ushqimore, por kemi një grurë me cilësi të lartë në Shqipëri, pse mos e hamë?
Përmirësimi gjenetik ose gjenetika është një nga instrumentet që zgjidh probleme globale. Sepse sot në botë problemi më i madh është siguria ushqimore për shkak të rritjes së popullsisë në botë. Në këtë drejtim janë dy mundësi. Përmes ndërhyrjes gjenetike dhe ndërhyrjes në teknologjitë e kultivimit, përmirësimi i plehrave, ujitjes. Por kjo ndërhyrja në teknologjinë e kultivimit ka kosto të mëdha. Ndaj si zgjidhje janë ndërhyrjet gjenetike. Prandaj them se te ne ky aktivitet duhet të marrë zhvillim. Sepse nuk mund të ngelesh vetëm me varietetet që krijojnë të tjerët (në grurë apo misër). Sepse kanë kufizime dhe nuk i përshtaten kushteve tona. Duke mbajtur këtu farën ke mundësi ta kontrollosh më mirë cilësinë e saj, sepse nga jashtë ndodh që sjellin edhe byk, grurë apo misër të përzier, pa vlera. Janë shitur shumë në treg sepse korrupsioni nuk është vetëm në Shqipëri, por gjithandej.
Ky aktivitet ka qenë i zhvilluar para ‘90-ës. Kanë qenë disa institute që merreshin me përmirësimin gjenetik; Instituti i kërkimit të Lushnjës që merrej me grurin, i Shkodrës që merrej me misrin apo orizin, ishte dhe Instituti Bujqësor si alternativë, që merrej me grurin dhe misrin. Para viteve 1990 ka qenë shumë i zhvilluar përmirësimi gjenetik. Sot mbillet 50-60 mijë hektarë grurë dhe po kaq misër. Ndërsa atëherë mbilleshin 200 mijë hektarë grurë apo misër. Në këto shifra ne nuk shkojmë dot, por ama mund të kapim 100 mijë. Pse duhet ta importosh grurin nga Ukraina, Serbia, Rusia? E para vijnë produkte me tregues të ulët nga pikëpamja e teknologjisë ushqimore, nivel i ulët proteine, cilësi e ulet e bukës. Plus që janë dhe kontingjente që mbeten në magazina dhe vijnë këtu. Ndaj prodhohet një bukë me cilësi të dobët. Unë vetë bukën e marr edhe në treg, por marr 20-30 kilogram miell me grurë vendi dhe e gatuaj në shtëpi. Por jo gjithmonë. Ne kemi krijuar varietete të cilësisë së lartë, pse mos i hamë? Kjo punë do ecë sepse janë krijuar kushtet në Shqipëri dhe Kosovë, janë vendosur makineritë që duhen. Gruri që prodhohet në vend është shumë më i mirë se ai jashtë. Problemi tjetër është që të ikën valuta jashtë. Pse të ndodhë kjo kur ke tokë shumë të mirë?”, tha Salillari në DritareTV.
