Rusia ka akuzuar zyrtarisht Francën dhe Britaninë e Madhe për ndihmë ndaj Ukrainës në sulmin ndaj infrastrukturës së tubacionit Sudzha në rajonin Kursk.
Zëdhënësja e Ministrisë së Jashtme ruse, Maria Zakharova, deklaroi se sulmi u krye të premten me ndihmën e satelitëve francezë dhe specialistëve britanikë, të cilët sipas saj, ndihmuan në përcaktimin e objektivave dhe lëshimin e raketave.
“Komanda erdhi nga Londra,” tha Zakharova, duke e cilësuar sulmin si pjesë të një fushate “terrori” nga Kievi kundër infrastrukturës energjetike të Rusisë. Ajo shtoi se këto veprime tregojnë se “Ukraina është e pamundur të negociohet”.
Moska kishte urdhëruar ndalimin e sulmeve ndaj infrastrukturës energjetike të Ukrainës më 18 mars, pas një telefonate mes presidentëve Vladimir Putin dhe Donald Trump, shkruan euronews.al. Sipas marrëveshjes, Rusia dhe SHBA kishin rënë dakord për një listë të objekteve energjetike, përfshirë ato të gazit, që nuk duhet të ishin shënjestër në kuadër të një armëpushimi të dakordësuar më herët gjatë javës.
