Zëvendëskryeministri i Kosovës, Besnik Bislimi, ka sqaruar konfuzionin rreth rregullores së re të Bankës Qendrore të Kosovës (BQK) për “Operacionet me Para të Gatshme”, e cila u miratua në fund të dhjetorit, përcjell KosovaPost.
Sipas zëvendëskryeministrit, rregullorja nuk sjell ndonjë ndryshim në listën e mjeteve të lejuara të pagesave, duke përputhur të gjitha specifikat me neni 11 i Kushtetutës së Republikës së Kosovës.
Bislimi theksoi se në Republikën e Kosovës monedha e vetme e lejuar për përdorim si mjet pagese është Euro, dhe se BQK vazhdon të jetë autoriteti i pavarur bankar në vend, siç është paraparë në këtë nen të Kushtetutës.
Ai vuri në dukje se çdo sugjerim për anulimin e përdorimit të dinarit është i pavend pasi kurrë nuk ka qenë i lejueshëm.
Zëvendëskryeministri shtoi se asnjë valutë tjetër rajonale, duke përfshirë dinarin, të asnjë shteti fqinj nuk është përmendur në këtë rregullore prej 40 faqesh.
“Çdo interpretim tjetër është i pasaktë dhe ka për qëllim manipulimin e opinionit publik,” tha Bislimi, duke nënvizuar rolin e BQK-së në dizajnimin, zbatimin dhe mbikëqyrjen e politikave monetare.
Në fund, zëvendëskryeministri hodhi poshtë pretendimet se rregullorja është produkt i negociatave politike në Bruksel dhe sqaroi se ajo nuk ka si të ketë ndikim në normalizimin e marrëdhënieve me Serbinë.
Ai theksoi se transparenca në importin e valutave të huaja dhe konvertimi i tyre në Euro nuk ndikon negativisht në ekonominë e përgjithshme dhe nuk shkakton krizë humanitare.
