Në Prishtinë është hapur ekspozita e parë rajonale e organizuar bashkërisht nga gjashtë vende të Ballkanit Perëndimor për nder të Ditës Botërore të Lirisë së Shtypit, e cila shënohet më 3 maj.
Ekspozita me karikatura për Lirinë e Medias e cila u hap në Lapidariumin e Muzeut Kombëtar, u mundësua nga Ambasada e Holandës në Kosovë në bashkëpunim me Asociacionin e Gazetarëve të Kosovës (AGK).
Kryetari i Bordit të AGK-së, Xhemajl Rexha tha se ka pasur një proces përzgjedhës për karikaturat më të mira nga artistë nga vende të rajonit në temën e lirisë së shtypit. “Ne i kujtojmë qeverisë tonë, i kujtojmë qeverive të botës për rolin që kanë në ruajtjen e lirisë së shtypit dhe medias. Siç e dini, ka qenë një vit i vështirë për gazetarët në Kosovë në kuptimin sigurisë”, theksoi Rexha.
Ambasadorja e Holandës në Kosovë, Carin Lobbezoo, përmendi gazetarët ukrainas dhe ata nga Afganistani të cilët po qëndrojnë në Kosovë si fakt që tregon se sa e vështirë është të bësh gazetari në rrethanat e tyre. Ajo tha se liria e shtypit është komponent kyç në funksionimin e demokracisë dhe një pjesë në këtë rol e synon edhe karikatura.
“Ata përdorin lapsat e tyre për t’i mbajtur të pushtetshmit nën llogari, duke ekspozuar karikatura që kanë të bëjnë me drejtësinë, keqpërdorimin e detyrës, korrupsionin dhe shumë shpesh ata të bëjnë të qeshesh për shkak se me punën e tyre nxjerrin absurditetin e disa vendimeve ose thjesht atë që të gjithë po e mendojnë por askush nuk po e thotë”, theksoi Lobbezoo.
Në këtë ekspozitë me 44 karikatura e cila do të jetë e hapur për vizitorë deri më 3 maj, morën pjesë autorë nga Kosova, Maqedonia e Veriut, Shqipëria, Mali i Zi, Serbia dhe Bosnjë e Hercegovina, raporton Anadolu.Dita Botërore e Lirisë së Shtypit u shpall nga Asambleja e Përgjithshme e Kombeve të Bashkuara për të ngritur vetëdijen dhe rëndësinë e lirisë së shtypit dhe për t’ua kujtuar qeverive detyrën që kanë në drejtim të zbatimit të së drejtës së shprehjes së lirë që është e garantuar me nenin 19 të Deklaratës së Përgjithshme të të Drejtave të Njeriut.
