Ish-kryeministri i Shqipërisë Pandeli Majko, është shprehur se kryeministri i Kosovës, Albin Kurti, ndodhet në një presion shumë të madh, pasi sipas tij, bandat në Veri provokojnë shqiptarët.
Komentet Majko i bëri në emisionin “Open” në News24, ku tha gjithashtu se nëse Kosova do të hynte në luftë me Serbinë, atëherë sipas tij, edhe Shqipëria do ta bënte një gjë të tillë.
Sipas tij, serbët edhe kur i kanë vrarë shqiptarët, kanë thënë se viktima janë ata.
Edhe kur na kanë vrarë kanë thënë viktimat jemi ne. Ata që ne i konsiderojmë miq të mos mendojmë se helmi i sjelljes serbe në rajon, na ka hyrë edhe në gjak. Albin Kurti për momentin nuk ka bërë gabime të jashtëzakonshme, është në presion shumë të madh për t’u përballur me bandat. Historia që po zhvillohet në Kosovë është në dukje serbe por gjërat janë më të thella. Është e paimagjinushme që një qeveri që ka ushtarë të NATO-s atje, të shtrohet pyetja nëse do të na fusni në luftë të paktën na thoni.
Nëse Kosova do të hyjë në luftë, sado të mërzitur të jenë Rama me Kurtin një gjë është e padiskutueshme Shqipëria do të shkojë pas saj. Ka një profil diskutimi sikur Shqipëria e ka lënë pas Kosovës, mendoj që Ramën duhet të kuptojnë ashtu siç është, tradhtitë nuk bëhen me shprehje publike, ruhuni nga ata që nuk flasin, jo Ramës që gjysmat i ka me humor”, tha ndër të tjera ai.
