Me rastin e ndarjes nga jeta të akademik Rexhep Ferri, kryetari i LDK-së, Lumir Abdixhiku dërgon telegram familjes, ndërsa thekson se Kosova ka humbur personalitetin e shquar të artit, përcjell Kosova Post.
Ndërsa shpreh pikëllimin për humbjen e akedamik Ferri, Abdixhiku theksoi se “Vepra e akademik Rexhep Ferri, prej pedagogu, e artisti do të kujtohet përjetësisht në historinë shqiptare”.
Tutje theksoi Abdixhiku se akademiku Ferri “do të mbetet personifikim i njeriut, që për dekada të tëra nuk pushoi së punuari për të mirën e vendit”
Telegrami i plotë i Abdixhikut:
“E nderuara familje Ferri,
Me pikëllim të thellë, morëm lajmin për ndarjen nga jeta të akademik, Rexhep Ferri. Ju humbët njeriun e dashur për ju, ndërsa Kosova humbi personalitetin e shquar të artit e pedagogun, Rexhep Ferri.
Me punën e tij të palodhshme, akademik Ferri, gjatë gjithë jetës dha shembullin e njeriut të përkushtuar për arsimimin e brezave të rinj. Vepra e akademik Rexhep Ferri, prej pedagogu, e artisti do të kujtohet përjetësisht në historinë shqiptare. Ai do të mbetet personifikim i njeriut, që për dekada të tëra nuk pushoi së punuari për të mirën e vendit. Ndërsa, arti i tij, do të mbetet udhërrëfyes për brezat e ardhshëm, në fushën e artit, kulturës dhe shkencës.
Në emrin tim personal dhe gjithë anëtarësisë së Lidhjes Demokratike, ju shpreh ngushëllime familjes, miqve dhe të gjithë atyre që njohën akademik Ferrin.
I përhershëm do të jetë kujtimi për të!”
