Nxënësit e shkollës International Maarif Schools of Kosova- Dega në Prizren, Ari Krasniqi, Muhamed Alemdar, dhe Resul Smaili, nën drejtimin e trajnerit të tyre të përkushtuar, Behajdin Gjinali, kanë arritur një sukses të jashtëzakonshëm duke u shpallur Kampionë Republikane në garat e pingpongut të organizuara nga Federata e Pingpongut dhe Sportet Shkollore të Republikës së Kosovës, transmeton Kosova Post.
Pas fitores së tyre si kampionë në Garat Komunale të Prizrenit, ekipi përfaqësues i IMSK-Prizren vazhdoi me fitore në Garat Rajonale të Rajonit të Prizrenit, për t’u kurorëzuar më në fund si Kampionë të Kosovës në Finalen Kombëtare të mbajtur në Ferizaj më 17 Janar 2025. Gjatë gjithë rrugëtimit, nxënësit treguan aftësi të shkëlqyera, përkushtim dhe frymë ekipore, duke mposhtur lojtarët e tjerë në kategorinë e shkollave të mesme të ulëta.
Triumfi i ekipit të shkollës Maarif-Prizren është një burim frymëzimi për gjithë nxënësit dhe shkollat në Kosovë, duke treguar se suksesi është i mundshëm kur pasioni, puna dhe mbështetja bashkohen.
Me këtë arritje të madhe, nxënësit dhe trajneri i tyre janë gati të përfaqësojnë Kosovën në arenën ndërkombëtare, duke synuar të sjellin suksese të tjera për vendin tonë.
Urime kampionëve dhe gjithë stafit të IMSK për këtë sukses të madh!
