Pas vendimit të Gjykatës Komerciale e cila ka pezulluar vendimin e Zyrës së Rregullatorit të Energjisë për daljen në treg të hapur të bizneseve, përfaqësues të tyre kërkojnë që ky vendim të respektohet. Nga Oda Ekonomike e Kosovës dhe juristë thonë se mos zbatimi i vendimit të Komerciales nga ZRRE-ja, përbënë vepër penale. Nga ZRRE-ja nuk kanë treguar për Radio Kosovën nëse do ta zbatojnë ose jo vendimin e Komerciales, por kanë paralajmëruar ankimim.
Një ditën kur do të skadonte afatit për daljen në treg të hapur të energjisë për bizneset me mbi 50 punëtorë ose mbi 10 milionë euro qarkullim në vit, Gjykata Komerciale vendosi të pezullojë një pjesë të vendimit të Zyrës së Rregullatorit të Energjisë për liberalizimin e tregut të energjisë, duke i cilësuar si të kundërligjshme.
Radio Kosova ka pyetur ZRRE-në, nëse do ta respektojnë ose jo vendimin e Komerciales, për të cilin kanë paralajmëruar ankesë, por nga ky institucion nuk kanë kthyer përgjigje.
Procesi i tregut të lirë tashmë është proces i pezulluar nga Gjykata, thotë avokatja Blinera Osmani, përfaqësuese e biznesit që kishte paditur ZRRE-në për vendimin për kalimin në tregun e lirë të energjisë. Ajo shpreson që ZRRE-ja ta respektojë vendimin e Komerciales dhe ta ndalojë procesin e kalimit në treg të lirë të energjisë.
“Për sa i përket pikës së katërt – pezullimit të vendimit, ankesa nuk e ndalë ekzekutimin e vendimit në lidhje me pezullimin, që do të thotë se komplet procesi i tregut të lirë apo liberalizimit të energjisë elektrike duhet të stopohet deri në një vendim përfundimtar apo të formës së prerë nga Gjykata Komerciale”, tha ajo.
Edhe kryetari i Odës Ekonomike të Kosovës, Lulzim Rafuna, kërkon nga ZRRE-ja që të respektohet vendimi i Komerciales për kalimin e bizneseve në treg të lirë të energjisë. Në të kundërtën, njëjtë si edhe juristja Osmani, Rafuna thotë se ZRRE-ja do të bënte vepër penale.
“Nëse ZRRE -ja, sot paradite nuk merr vendim për ta pezulluar komplet vendimin për tregun e lire, sipas këtij aktgjykimi do të shkaktojë vepër penale, për shkak se moszbatimi i aktgjykimit paraqet vepër penale. Kështu që, ne kemi pritje që sot paradite ZRRE –ja, do të mblidhet në një mbledhje urgjente dhe të vendosë sipas aktgjykimit të Gjykatës Komerciale, për ta pezulluar daljen në treg të lirë, deri në një vendim meritor që do të vije nga gjykata apo që do të akordohemi të gjithë palët e interesit së bashku”, tha ai.
Radio Kosova ka pyetur Kompaninë Kosovare për Distribuuim me Energji Elektrike – KEDS, nëse kanë filluar me shkyçjen e konsumatorëve, ashtu siç i kishin paralajmëruar bizneset të mërkurën. Por, zëdhënësi i KEDS-it, Lulzim Krasniqi, në një bisedë telefonike, nuk ishte i gatshëm të konfirmojë nëse kanë filluar apo jo me shkyçjen e konsumatorëve. Ai tha se për këtë të pyetet ZRRE-ja, por, edhe nga kjo e fundit nuk kanë treguar se a ka filluar shkyçja e konsumatorëve të cilët nuk kanë arritur kontrata për kalim në treg të hapur.
